Յակուտիայում չեն դադարում բողոքի ակցիաները' 4 տարեկան երեխայի բռնաբարության դեպքի կապակցությամբ: Ինչպես հաղորդում է «Ինտերֆաքս» գործակալությունը, բռնաբարությունը կատարած տղամարդուն արդեն մեղադրանք է առաջադրվել, եւ նրան սպառնում է 12-20 տարվա ազատազրկում: Նշանակվել են մի շարք փորձաքննություններ, իսկ քննիչները զրուցում են տուժածի հարազատների հետ, հարցաքննում այն անձանց, ովքեր խմել են մեղադրյալի հետ այդ օրը: Երեխայի բռնաբարության դեպքը, որը մեծ արձագանք է գտել Յակուտիայում, տեղի է ունեցել սեպտեմբերի 8-ին: Դեպքի վայրում ոստիկանները ձերբակալել էին 3 հոգու, բայց նրանցից միայն մեկն է ներկայումս կալանքի տակ: Մյուս երկուսը քրեական գործով անցնում են որպես վկա: Բողոքի ակցիաների մասնակիցները պահանջում են մահապատժի դատապարտել մանկապիղծին եւ հայտարարել են, որ կշարունակեն փողոց դուրս գալ, եթե քրեական գործով առաջընթաց չլինի: Իշխանությունները խոստացել են հանցագործին դատապարտել օրենքի ամբողջ խստությամբ եւ կոչ արել բարկացած բնակչությանը գործել օրենքի սահմաններում: