News.am Հայկական արտադրության առաջին պլանշետն ունի 4 պրոցեսոր և հայկական արտադրության օպերացիոն համակարգ: Այս մասին այսօր' փետրվարի 4-ին, հայկական առաջին պլանշետի' ArmTab-ի պաշտոնական ներկայացման ժամանակ ասաց «Ինստիգեյթ դիզայն» ընկերության հիմնադիր Վահագն Պողոսյանը:
«Օպերացիոն համակարգը բաղկացած է երկու մասից' «Արաքս» օպերացիոն համակարգ, որը ստեղծել է Նորայր Չիլինգարյանը («Նաիրի» կոնսորցիում) և «Ոստան» աշխատանքային միջավայր»,-ասաց Վահագն Պողոսյանը' ավելացնելով, որ պլանշետը իր գնի համեմատ ունի շատ որակյալ, բոլոր անկյունների տակ երևացող էկրան:
Հայկական առաջին պլանշետում ներառված են մի շարք ուսուցողական ծրագրեր դպրոցականների համար: Ռոբոտաշինության համար նախատեսված ծրագիրը, օրինակ, տեսանյութերի միջոցով նաեւ ուսուցիչների վերապատրաստման խնդիրն է լուծում:
«Ծիրանի» մշակութային հանգույցի մշակած ծրագիրը դպրոցականներին տեսաձայնային նյութերի միջոցով սովորեցնելու է գրաբար, իսկ «Խոսող գիրք» ծրագրում ներառված են ժողովրդական հեքիաթներ' Հայաստանի բոլոր բարբառներով:
Դպրոցական ծրագրում ներդրվող նոր առարկայի' ազգային պարի համար նախատեսված ծրագիրը տեսանյութերով սովորեցնում է հայկական ազգային պարերի բոլոր շարժումները, նաեւ պարունակում է ինֆորմացիա տվյալ պարի ծագման մասին:
