Նախկին ԽՍՀՄ երկրներից Հայաստանն առանձնանում է հասարակական կարծիքի միօրինակությամբ՝ անկախ տարիքից: NEWS.am-ի թղթակցի հետ զրույցում նման կարծիք հայտնեց «Baltijos Tyrimai» («Baltic Surveys») լիտվական սոցիոլոգիական կազմակերպության տնօրեն Ռասա Ալիշաուսկենեն:
Նրա խոսքով, Հայաստանն տարբերվում է մյուս հետխորհրդային երկրներից. այստեղ հասարակական կարծիքը չի սեգմենտավորվում ըստ տարիքի:
«Ձեր հարեւան Վրաստանում նման բաժանում կա: Բալթյան երկրներում այդ բաժանումն ուժեղ է, Ուկրաինայում եւ Մոլդովայում՝ ավելի ուժեղ, նույնը նաեւ Ռուսաստանում է: Հայաստանում նույնպես կան մտածողության տարբերություններ՝ կրթության մակարդակի, քաղաքային եւ գյուղական բնակչության միջեւ, բայց ոչ մեկ ընտանիքի սահմաններում: Այստեղ երիտասարդությունը նույնպես գյուղից հեռանում է քաղաք ուսանելու եւ աշխատելու, բայց գյուղում մնացած ծերերը մտածում են գրեթե նույնկերպ, ինչպես նրանց քաղաք գնացած թոռները»,-վստահեցրեց նա:
