Բարաք Օբամայի վարչակազմը պլանավորում է ավելացնել Ուկրաինային զուցաբերվող ռազմական օգնությունը եւ հուսով է, որ ԱՄՆ-ի Կոնգրեսը այդ նպատակով լրացուցիչ միջոցներ կհատկացնի 2015 ֆինանսական տարվա բյուջեից: Այդ մասին, ինչպես տեղեկացնում է «Արմենպրես»-ը, ԱՄՆ-ի պաշտոնատարները հայտնել են երկրի փոխնախագահ Ժոզեֆ Բայ դենի՝ Մարոկո, Ուկրաինա եւ Թուրքիա կատարած ուղեւորության արդյունքներին նվիրված բրիֆինգում:
Բայդենը նոյեմբերի 21-ին գտնվել է Կիեւում, որտեղ հանդիպումներ է անցկացրել նախագահ Պյոտր Պորոշենկոյի եւ վարչապետ Արսենի Յացենյուկի հետ:
«Մենք անվտանգության բնագավառում ընդլայնում ենք մեր օժանդակությունն Ուկրաինային,- ասել է ԱՄՆ-ի ներկայացուցիչներից մեկը:- Այնտեղ արդեն ուղարկվել են մեր ռադարներից մի քանիսը՝ բացահայտելու եւ ոչնչացնելու ականանետները, եւս մի քանիսը այնտեղ կհասցվեն մոտ ժամանակներս: Մենք նաեւ Ուկրաինա ենք ուղարկում ռազմական հանդերձանքի ու տեխնիկայի ավելցուկները, մասնավորապես, «Համվի» բանակային արտաճանապարհայինները եւ այլ մեքենաներ: Մենք այդ նպատակով արդեն հատկացրել ենք 100 մլն դոլար եւ հույս ունենք, որ կկարողանանք եւս մի քանի տասնյակ միլիոն ծախսել ուկրաինացի զինծառայողների ուսուցման համար»:
Միեւնույն ժամանակ, խոսելով Ուկրաինայի ֆինանսատնտեսական օգնության մասին, ամերիկացի պաշտոնատարներն ընդգծել են, որ այն պետք է ստացվի բազմաթիվ երկրներից եւ միջազգային կազմակերպություններից: «Մենք ինքներս չենք կարող այն ապահովել բավարար ծավալով: Կպահանջվի ԱՄՀ-ի եւ եվրոպացիների մասնակցությունը»,- նշել է Օբամայի վարչակազմի ներկայացուցիչներից մեկը, հաղորդել է ՏԱՍՍ-ը:
