ՀՀ Կենտրոնական ընտրական հանձնաժողովը մերժեց «Հյուսիսային դարպաս» հասարակական կազմակերության՝ 2017 թվականի ապրիլի 2-ի ընտրություններում դիտորդների հավատարմագրման մասին դիմումը: Կենտրոնական ընտրական հանձնաժողովի նախագահ Տիգրան Մուկուչյանի խոսքով' կազմակերպության կանոնադրությունը հաստատված է 2016 թվականի ապրիլի 14-ին եւ պետական ռեգիստրում այն գրանցվել է 2016 թվականի ապրիլի 28-ին:

 

«Քաղաքացիական օրենսգրքի եւ իրավաբանական անձանց պետական գրանցման մասին օրենքի համաձայն' կազմակերպության իրավաունակությունը ծագում է պետական գրանցման պահից: Ընտրական օրենսգիրքը հավատարմագրվելու իրավունք է ընձեռում միայն այն հասարակական կազմակերպություններին, որոնց կանոնադրական նպատակներն ընտրությունները նշանակելու օրվան նախորդող նվազագույնը մեկ տարի ներառում են ժողովրդավարության եւ մարդու իրավունքների պաշտպանության հարցեր եւ որոնք չեն աջակցում ընտրություններին մասնակցող կուսակցություններին»,- հավելեց ԿԸՀ նախագահը: