Այսօր կամ վաղը հայտնի կլինի Երևանի ավագանու ընտրություններում ԲՀԿ ցուցակը: Ըստ մամուլի տեղեկությունների' առաջին տեղում լինելու է ԱԳ նախկին նախարար Վարդան Օսկանյանը, նրան հաջորդելու է ՄԱԿ նախագահ Գուրգեն Արսենյանը, իսկ երրորդ տեղում լինելու է Նաիրա Զոհրաբյանը: ԲՀԿ առաջնորդ Գագիկ Ծառուկյանը չի կարող մասնակցել այս ընտրություններին, քանի որ Երևանի բնակիչ չէ: Ուշագրավ է, որ ԲՀԿ ցուցակի նախկին առաջատար Հարություն Քուշկյանի մասին խոսք չկա, մինչդեռ ԲՀԿ-ն քաղաքապետի նախորդ ընտրություններում հանդես էր գալիս նրա դեմքով: Երեկ այս հարցերի շուրջ «Առաջին լրատվական»-ը զրուցեց ՄԱԿ առաջնորդ Գուրգեն Արսենյանի հետ:

- Պարոն Արսենյան, տեղեկություններ կան, որ Երևանի ավագանու ԲՀԿ ցուցակում Դուք երկրորդն եք Վարդան Օսկանյանից հետո: Ճի՞շտ է:

- Մարտի 9-ին կամ 10-ին վերջնական որոշումը կկայացվի: Բոլորդ կտեղեկացվեք:

- ԲՀԿ քաղխորհրդի վերջին նիստում, որին նաև Դուք էիք մասնակցում, Գագիկ Ծառուկյանը բավական ընդդիմադիր դիրքերից ելույթ ունեցավ: Սա նշանակո՞ւմ է, որ ԲՀԿ-ն ևս մտնում է ընդդիմադիր ձայների համար պայքարի մեջ և ուզում է ավագանու ընտրություններով կրկին տիրանալ ոչ իշխանական ձայներին:

- Գագիկ Ծառուկյանի տեսակետը, որը հնչել է քաղխորհրդի նիստում, ոչ մի բանով չի տարբերվում այն տեսակետից, որն արտահայտվել ու հնչեցվել է ԱԺ ընտրություններից հետո: Սկզբունքային նույն համակարգի մեջ է հնչող տեսակետը: Բան չի փոխվել և տոնայնության մեջ, և հռչակված նպատակների մեջ: Նույնն է ասվել, կարող եք համեմատել:

- Ասել է թե' այն ժամանակ էլ նույն ցանկությունը կար ոչ իշխանական ձայներին տիրանալու, այս անգամ էլ:

- Դա ձեր մեկնաբանությունն է: Ես պարզապես ասում եմ' ինչ կա: Մեր դիրքորոշումները, որ կային, չեն փոխվել: Թե մեր դիրքորոշումները ինչ ընտրազանգվածի համար են գրավիչ, դա արդեն մեկնաբանությունների հարց է:

- Գագիկ Ծառուկյանն ասաց, որ ԲՀԿ-ն ժողովրդի կողքին է և պետք է լինի ժողովրդի կողքին, սակայն այդպես էլ չի ասվում, թե ինչ առնչություն կարող է ունենալ ԲՀԿ-ն Րաֆֆի Հովհաննիսյանի հետընտրական շարժման հետ: Չե՞ք կարծում, որ եթե նման հայտարարություն է արվում, պետք է գնա, կանգնի ժողովրդի կողքին:

- Դա մեկնաբանությունների հարց է, ամեն մեկն իր ձևով է մեկնաբանում, սակայն հիշեցնեմ, որ մոտ երեք ժամանոց հանդիպում է տեղի ունեցել Րաֆֆի Հովհաննիսյանի ու Գագիկ Ծառուկյանի միջև: Այդ հանդիպման ժամանակ մարդիկ չեն նստել ու խոսել եղանակի մասին, ինչ-որ բաների մասին խոսացել են, ինչ-որ բաներ քննարկել են, ինչ-որ սկզբունքներ փորձել են իրար հետ համաձայնեցնել կամ քննարկել: Սպասենք դրա դրսևորմանը:

- Կարելի՞ է ասել, որ որոշակի համաձայնության են եկել Րաֆֆի Հովհաննիսյանի հետ:

- Քննարկում է տեղի ունեցել, սպասեք այդ քննարկման արդյունքներով որևէ առարկայական գործողության. կամ կլինի, կամ չի լինի:

- Իսկ Դուք տեղյա՞կ եք' ինչի մասին է եղել խոսակցությունը:

- Երկրում ստեղծված իրավիճակի մասին: Այն իրավիճակի մասին, որը ստեղծվել է հետընտրական պրոցեսի ժամանակ: Պրոցեսներ են ընթանում, սպասենք, տեսնենք:

- Գագիկ Ծառուկյանը ԲՀԿ նիստում հայտարարեց. «Վրաստանում մերոնք են եկել»: Ձեր կարծիքով' ի՞նչ նկատի ուներ «մերոնք» ասելով, ի՞նչ ընդհանրություններ կան Իվանիշվիլիի և Ծառուկյանի միջև և ի՞նչ կապ կա:

- Ես լսել եմ էդ արտահայտությունը և կարող եմ ընդամենը ենթադրություն անել, որ կան որոշակի միջկուսակցական կամ անձնական կապեր: Ես չեմ կարծում, որ Վրաստանի իշխանություններն այսօր «մերոնք» ու «նրանք» են, Վրաստանի իշխանությունները դա Վրաստանի իշխանություններն են: Երևի այդ թևերից մեկի հետ ավելի մոտ ու ավելի արդյունավետ կապեր կան:

- Որպես ՄԱԿ կուսակցության առաջնորդ, կուզենայի իմանալ, Ձեր տեսակետը' ավագանու ընտրություններում միասնական հանդես գալու Կոնգրեսի առաջարկի վերաբերյալ:

- Կոնգրեսն իր առաջարկությունն արել է, բերել է իր հիմնավորումները: Որպես ՄԱԿ կուսակցության նախագահ' ես այդ առաջարկները կարդացել եմ: Կոնգրեսի բերած հիմնավորումները ուշադրության արժանի են: Մենք ԲՀԿ-ի հետ միասնական թիմով ենք գնացել խորհրդարանական ընտրությունների և քաղաքի ավագանու հետ կապված միասնական որոշում ենք կայացնելու:

- Եթե քաղաքական ուժերը մեկ ցուցակով գնան ընտրության, այդ ցուցակը բավական խայտաբղետ կլինի, Դուք դա իրատեսական համարո՞ւմ եք:

- Երբ մի քանի քաղաքական ուժեր հանդես են գալիս միասնական ճակատով, և այդ ճակատի դրսևորումը ցուցակն է, ակնհայտ է, որ դա պետք է լինի խայտաբղետ: Խայտաբղետ կլինի նաև այն պատճառով, որ ցուցակում կներկայացվեն վստահություն ներշնչող թեկնածուներ, որոնք զբաղված են քաղաքական գործունեությամբ: Խայտաբղետ բառը ես կփոխարինեի ավելի ծանրակշիռ բառով:

- Իսկ հնարավո՞ր է, որ ԲՀԿ-ն կամ Ձեր կուսակցությունը միանան այդ նախաձեռնությանը:

- Մեր կուսակցության դեպքում ես ասում եմ, որ մենք ունենք մեր դիրքորոշումները, որոնք շարադրեցի: Մենք ԲՀԿ-ի հետ միասին գնացել ենք ԱԺ ընտրությունների, և եթե մասնակցելու լինենք Երևանի ավագանու ընտրություններին, ապա կմասնակցենք միասին: Հնչեցված բոլոր առաջարկները, այդ թվում' այդ առաջարկը, ԲՀԿ-ում քննարկվում են:

- Անցած 4 տարիներին ԲՀԿ-ն եղել է Երևանու ավագանու կազմում: Ինչպե՞ս եք գնահատում ԲՀԿ կատարած աշխատանքը, և արդյոք այն կարողանո՞ւմ է ինչ-որ բան փոխել, ինչ-որ բան անել:

- 2009-ի ավագանու ընտրություններով ՀՀԿ-ն կառավարման պատասխանատվությունն իր վրա վերցրեց: Ավագանու ԲՀԿ-ական անդամները որոշումների կայացման հարցում էական մասնակցություն չեն կարող ունենալ, որովհետև ՀՀԿ-ն մեծամասնություն է Երևանի ավագանիում: Սակայն ես գիտեմ, որ ավագանու ԲՀԿ-ական անդամները իրենց աշխատանքը, այդ թվում' վերահսկողական, բավական բարձր արդյունավետությամբ են իրականացրել:

- Իսկ ի՞նչ երաշխիք, որ այս անգամ ավելի շատ ձայներ կլինեն, և որոշիչ դեր կունենա ԲՀԿ-ն Երևանի ավագանիում:

- Ո՞վ կարող է նմանատիպ երաշխիք տալ, ընտրություն է: Եթե երևանցիները մեծացնեն իրենց աջակցության չափը, նշանակում է' ԲՀԿ ներկայացվածությունը կլինի ավելի մեծ: