Mardik.am. Հարցազրույց ՄԱԿ նախագահ, ԱԺ ԲՀԿ խմբակցության պատգամավոր, ավագանու ընտրությունների ԲՀԿ համամասնական ցուցակի երկրորդ համար Գուրգեն Արսենյանի հետ:
Mardik.am - Ինչպես եք գնահատում քարոզարշավի արդյունավետությունը և քաղաքական ուժերի մրցակցությունը:

Գ. Արսենյան - Քարոզարշավն ընթանում է շատ նորմալ աշխատանքային մթնոլորտում: Մարդկանց հետ հանդիպումներն անցնում են ջերմ, գործնական միջավայրում և մեր հետագա ծրագրերը շատ ջերմ արձագանքի են արժանանում: Բացի այդ, մենք քաղաքացիներից ստանում ենք ուղերձներ, նոր մտքեր, թե ինչ կարելի է անել, որպեսզի ավելի արագ և արդյունավետ վերացնել խոչընդոտները: Ինչ վերաբերում է մրցապայքարին, ապա մենք հասկանում ենք այն բոլոր գործիքները, որոնցով հատկապես իշխանական թևը ներկայացնող մրցակիցները աշխատում են մեր դեմ: Մենք դրան շատ հանգիստ ենք վերաբերվում, հասկանում ենք իրենց անհանգստությունը, հասկանում ենք, թե ինչու են այդ գործիքները կիրառվում: Հասկանում ենք նաև, թե ինչու իրենց կողմից ֆինանսավորվող թերթերի պատվիրված հոդվածներում հայտնվում են այնպիսի տեսակետներ, որոնք բացարձակապես չեն համապատասխանում իրականությանը և քմծիծաղով, ժպիտով, մեկ-մեկ էլ զարմանքով դիտարկում ենք այդ ամենը: Դա մեզ չի անհանգստացնում, որովհետև մենք հայտնում ենք մեր տեսակետները, անում ենք այն, ինչ ասում ենք և մարդկանց հետ չունենք խարդախ մեթոդներով աշխատելու ցանկություն: Մենք հասկանում ենք նաև այն լրագրողներին, ովքեր այդ թերթերից աշխատավարձ են ստանում և իրենց տունն են պահում, մենք իրենց մաղթում ենք, որ իրենք միշտ կարողանան մեր ներկայացրած տեսակետների խեղաթյուրման հնարավորության շնորհիվ բարձրացնել իրենց ընտանիքների բարեկեցությունը, իրենք էլ են մեր քաղաքացիները, ոչինչ, այդ հնարավորությունն էլ ենք տալիս իրենց:

Mardik.am - Բացի այն, որ Ձեր խոստումները հաճելի են քաղաքացիներին, նաև Դուք պետք է ներկայացնեք ռեսուրսները, որոնց հիման վրա պատրաստվում եք իրականացնել այդ ծրագրերը: Օրինակ՝ նշում եք, որ մանկապարտեզներն եք ավելացնելու, գազի ներտնային սպասարկման վարձավճարն եք վերացնելու և այլն, բայց ինչի՞ հաշվին եք անելու, ի՞նչ ռեսուրսներով եք իրականացնելու:

Գ. Արսենյան - Ես հիմա ասում եմ այն, ինչ անելու ենք, ես ռեսուրսների աղբյուրը ձեզ հիմա ցույց չեմ տա, որովհետև հենց ցույց տամ, այն մարդիկ, ովքեր այսօր տնօրինում են այդ ռեսուրսները, շատ արագ կսկսեն այդ ռեսուրսները գողանալ: Այսօրվա քաղաքային իշխանություններն էլ այդ ամենը կարող էին անել, սակայն իրենք այդ ցանկությունը չունեին: Մենք ասում ենք, որ ունենք այդ ցանկությունը, այդ հնարավորությունները, իսկ թե ոնց և ինչ, դա ընտրություններից հետո կներկայացվի, երբ մենք կստանձնենք քաղաքային իշխանությունների պատասխանատվությունը:

Mardik.am – Այսինքն' խնդիրը վերաբերում է եղածը բաշխելո՞ւն, թե՞ նոր ռեսուրսներին:

Գ. Արսենյան - Ես միևնույն է չեմ ասելու մեր բոլոր հնարավորությունները, չեմ հուշի այս անարդյունավետ կառավարիչներին, թե ոնց ավելի էֆեկտիվ կառավարեն քաղաքը: Ես իրենց փոխարեն չեմ աշխատում, կլինենք մենք, մենք կանենք և մարդիկ կտեսնեն: Ուղղակի գողանալ պետք չէ, այն էլ այդ աստիճան անզուսպ:

Mardik.am - Քաղաքացիներին ինչ քաղաքական, տնտեսական, և ֆինանսական երաշխիքներ կարող եք ներկայացնել, որոնք կհամոզեն նրանց, որ Ձեր իշխանության ժամանակ ամեն ինչ նույնը չի լինելու:

Գ. Արսենյան - Քաղաքացիների ամենամեծ երաշխիքը դա մեր խոսքն է, և մեր ապրած կյանքը՝ թե ով ենք մենք: Եթե որևէ քաղաքացի պետք է մտածի, որ մարդիկ, ովքեր իրենց ողջ կյանքը զբաղվել են ստեղծելով, արարելով, աշխատելով՝ իրենց փորձում են խաբել, ապա դա արդենիսկ հասարակության ապագայի համար մեծագույն վտանգ է' վայն եկել մեզ տարել է: Կամ մարդիկ վստահում են մեզ և ստանում այդ վստահության դիմաց արդյունավետ կառավարում, կամ մնում են այն նույն վիճակի մեջ, որը որ կա:

Mardik.am - Խոսքը հավատալու մասին չէ, այլ վերահսկողության:

Գ. Արսենյան - Նույնը չի կարող լինել, որովհետև մենք իրականացնելու ենք կառավարման նպատակի փոփոխություն: Մեր կառավարման նպատակը չի լինելու իշխանությունն իրացնողների հարստացումը, այլ լինելու է քաղաքի և քաղաքացիների հարստացումը:

Mardik.am - Ինչպես եք այդ նպատակը տարածելու ներքևի օղակներում:

Գ. Արսենյան - Ես Ձեզ խոստանում եմ' այն պահին, երբ մենք կարձանագրենք մեր հաղթանակը և ձեռնամուխ կլինենք Երևան քաղաքի տնտեսության կառավարմանը, Ձեզ բացառիկ հարցազրույց տալ, որտեղ մանրամասն կշարադրեմ մեր կողմից հնչեցրած բոլոր ծրագրերի կատարման տեխնոլոգիան, ռեսուրսային աղբյուրները և ժամանակացույցը:

Mardik.am - Դուք քարոզարշավի շրջնակներում հանդիպումների ժամանակ նշում եք, որ ցանկություն ունեք գնալ և աշխատել, սակայն հայտարարվել է, որ եթե ընտրությունները կեղծվեն, ապա հնարավոր է, որ ԲՀԿ-ն մանդատները չվերցնի, այսինքն՝ այնքան էլ միանշանակ չէ Ձեր աշխատելու ցանկությունը՝ հակառակ նրա, որ Դուք հայտարարում եք, թե պահելու եք Ձեզ տված ձայները:

Գ. Արսենյան – Այն, ինչի մասին ասվել է՝ նախազգուշացում է ուղղված այն մարդկանց, ովքեր փորձ կանեն ընտրությունները կեղծել: Կեղծելու գայթակղության կանխարգելման դեմ ուղղված հայտարարություն էր: Մենք պատասխանատու ենք այս ընտրությունների իրական լինելու համար, այսինքն՝ ինչ կտեսնենք ընտրատեղամասերում հաշվարկի արդյունքում, մենք դրա համար պատասխանատու ենք: Մենք գործադրում ենք մեր բոլոր ռեսուրսները՝ կազմակերպչական, մարդկային, որպեսզի կարողանանք պատասխան տալ այս արված հայտարարության համար:

Mardik.am - Այլ քաղաքական ուժերի հետ համագործակցության հեռանկարն ինչպես եք գնահատում:

Գ. Արսենյան – Մենք բոլոր քաղաքական ուժերի հետ համագործակցության եզրեր տեսնում ենք, կարևորը, թե արդյոք այդ քաղաքական ուժերն ընդունում են այն նպատակները, որոնք մենք հռչակել ենք: Իսկ այդ նպատակներն ուղղված են մեր քաղաքացիների բարօրության բարձրացմանը, մարդկային, մասնագիտական, նյութական և այլ հնարավորությունների ավելի արդյունավետ իրացմանը: Համագործակցություն հնարավոր է այն ուժերի հետ, որոնք ընդունում են մեր կողմից հռչակված սկզբունքը, որ քաղաքի կառավարումն իրականացնելու ենք առանց գողանալու:

Mardik.am - ԲՀԿ-ն կարող է հայտարարել, որ եթե ոչ իշխանական ուժերից որևէ ուժ ԲՀԿ-ից առավել ձայն հավաքի, ԲՀԿ-ը կմիանա իրենց՝ Ձեր իսկ հռչակած մենաշնորհը վերացնելու համար:

Գ. Արսենյան - Մեր քաղաքական թիմն այս ընտրություններին գնում է հաղթելու նպատակով, և կարծում եմ, որ մեր հաղթելու պարագայում լայն համագործակցության հնարավորություն կա ցանկացած քաղաքական ուժի հետ: Այդ թվում նաև այն քաղաքական ուժերի հետ, ովքեր որ ներկայացված չեն լինի ավագանիում, սակայն ցանկություն կունենան իրենց կադրային, մտավոր, մասնագիտական հնարավորություններով օժանդակել վերոնշյալ խնդիրների լուծմանը:

Mardik.am – Մեղադրում եք իշխանություններին, որ ընտրություններից առաջ հանկարծ սկսել են տեսնել քաղաքի խնդիրները և ինչ-որ աշխատանքներ են փորձում իրականացնել։ ԲՀԿ-ն էլ նոր չի՞ հիշել քաղաքի խնդիրների մասին, այնինչ այսօրվա ավագանիում երկրորդ քաղաքական ուժն է, չնայած նրան, որ Դուք միշտ ասում եք, որ մեծամասնություն չեք և պատասխանատվություն չեք կրում:

Գ. Արսենյան - Ավագանիում այսօր քաղաքական և գործառնական պատասխանատվությունը կրում է քաղաքական մեծամասնությունը: Այսինքն՝ այդ քաղաքական ուժն է պատասխանատու և´ լավի, և´ վատի համար: Ես պարզապես արձանագրում եմ, որ «տարօրինակ զուգադիպությամբ» քաղաքային իշխանության աչքերն ընտրությունների նախօրեին են սկսում տեսնել այն խնդիրները, որոնք գուցե տարիների ընթացքում են կուտակվել: Սկսում են նաև իմիտացիա անել, թե հենց հիմա այդ խնդիրնեը կլուծեն, սակայն խնդիրները չեն լուծվում երկու շաբաթվա ընթացքում, այլ՝ ժամանակացույցով և անընդհատ:

Mardik.am – Մինչև հիմա ԲՀԿ-ն չի հայտարարել, թե հաղթելու դեպքում միանշանակ ով է լինելու քաղաքապետը, շրջանառվում են Ձեր կամ Վարդան Օսկանյանի անունները, դրա վերաբերյալ ինչ կասեք:

Գ. Արսենյան – Մենք գնում ենք հաղթելու և հաղթանակի արդյունքներն արձանագրելուց հետո մեր քաղաքական թիմը կկայացնի որոշում, թե ավագանու որ թեկնածուին կառաջադրի Երևանի քաղաքապետի պաշտոնում: Իսկ այդ որոշումը կկայացվի ելնելով նրանից, թե որ գործիչը կարող է և պատրաստ է ավելի արդյունավետ իրականացնել մեր կողմից հռչակված ծրագրերը:

Mardik.am – Նշվում է, որ Դուք լավ բիզնեսմեն եք, չնայած քաղաքապետի պաշտոնում ցանկալի և ընկալելի չեն համարում տեսնել բիզնեսմենին, դրա վերաբերյալ ինչ կասեք:

Գ. Արսենյան – Դուք ասում եք մի բան, որը հակասում է այն տրամաբանությանը, որով առաջնորդվում են լավագույն քաղաքների կառավարիչները: Մեզանում բիզնեսմեն խոսքն է աղավաղված, այսինքն' կարծես նորմալ է դարձել, որ բիզնեսի արդյունքում և չինովնիկական կառավարչության հաշվին փողի գոյացումը ասես նույն բանը լինի, ավելին' ուղղակի բիզնեսով փողի առաջացմանն էլ չեն հավատում, դա խորն արմատներ և շատ վտանգավոր հետևանքներ ունի, երբ արդենիսկ հմուտ դարձած չինովնիկական, այն է' կոռուպցիոն կապիտալըն ակտիվ գրոհում է բիզնեսի և մարդկանց կենսագործունեության վրա: Հենց այստեղ է, որ պետք է շահերի բախում լինի, որ երևանցիների գումարներից գոյացած քաղաքային բյուջեն պաշտոնյայի թեթև ձեռքով չհոսի իր կամ իր մտերիմների բիզնեսների շահերի բավարարմանը: Ակնհայտորեն տեղի է ունենում հասարակական շահերի ոտնահարում:

Mardik.am – Այսինքն' ցանկալի է, որպեսզի այդպիսի պաշտոններում բիզնեսմեններ լինե՞ն:

Գ. Արսենյան – Ցանկալի է, որպեսզի այդպիսի պաշտոններին լինեն այնպիսի մարդիկ, ովքեր առաջինը' ունեն հստակ ցանկություն՝ իրենց աշխատանքային գործունեությունն իրականացնել այն սկզբունքների շրջանակում, որոնք հռչակում են մինչև ընտրությունները և ունեն կազմակերպչական փորձ, մասնագիտական հմտություններ:

Mardik.am – Դուք Տարոն Մարգարյանին վերջին քսան տարվա լավագույն քաղաքապետը համարո՞ւմ եք:

Գ. Արսենյան – Ես նմանատիպ չափորոշիչներով չեմ առաջնորդվում է, թե ով է լավ, ով է վատ, քաղաքացիները դա պետք է ասեն:

Mardik.am – Որպես քաղաքացի, ինչպես եք գնահատում նրա աշխատանքը:

Գ. Արսենյան – Որպես քաղաքացի' ինձ համար Տարոն Մարգարյանը ՀՀԿ-ն ներկայացնող հերթական քաղաքապետն է: Ես նրա աշխատանքը ցանկություն չունեմ գնահատել, քանզի բազմից արտահայտվել եմ կառավարչական ողջ համակարգի անարդյունավետության և ապաշնորհության մասին, ավելի հստակ' 2008-ի ճգնաժամին հետևած տնտեսական խորն անկմանը և դրա հետևանքներին լուրջ չվերաբերելուց սկսած, մինչև ՀՀ-ն «շրջանցող» և «ճգնաճամից օգտվող» հայտնի որակավորումները:

Mardik.am – Քանի որ ասվում է, թե Երևանը փոքր պետություն է պետության մեջ, Դուք ցանկանու՞մ եք Երևանի կառավարումով ցույց տալ, թե ինչ է նշանակում արդյունավետ կառավարում:

Գ. Արսենյան – Երևանը Հայաստանի մայրաքաղաքն է, և այս իմաստով' պետություն է պետության մեջ: Որպես մայրաքաղաք՝ Երևանը հանդիսանում է երկրի դեմքը և երկրի սիրտը: Դեմքը պետք է խնամված և գեղեցիկ լինի, իսկ սիրտն էլ պետք է առողջ աշխատի, այդ դեպքում նաև շատ լավ կլինի Հայաստանի վիճակը:

Mardik.am – Դուք շարունակ քննադատել եք կառավարության գործունեությունը, ըստ Ձեզ, Սերժ Սարգսյանը չի՞ տեսնում այդ թերացումները, թե՞ տեսնելով հանդերձ շարունակում է պաշտպանել Տիգրան Սարգսյանի կառավարությունը:

Գ. Արսենյան – Ես քննադատում եմ կառավարության գործունեության արդյունքները, նպատակները, որոնք ինձ չեն գոհացնում: Սերժ Սարգսյանի' տեսնելու կամ չտեսնելու վերաբերյալ որևէ գնահատական չեմ կարող տալ, քանի որ դա իր խնդիրն է: Ես համոզված եմ իմ ասածների մեջ և որևէ մեկը, այդ թվում նաև հանրապետության նախագահ Սերժ Սարգսյանը, չի կարող ինձ համոզել, որ ես այդ հարցում ճիշտ չեմ: Ինձ միայն կարող են համոզել գործունեության արդյունքները, այսինքն՝ երբ կպակասի աղքատությունը, կավելանան աշխատատեղերը, կնվազի արտագաղթը, կբարձրանա մարդկանց բարեկեցությունը և կառավարության ուշադրության կենտրոնում կլինեն այն մարդիկ, ովքեր նոր բան են անում, հանրային բարիք են ստեղծում, ուժեղացնում են իրենց երկիրը և հասարակությունը: Երկրի տնտեսական այն հատվածի ներկայացուցիչները, ովքեր զբաղված են հանրային բարիք ստեղծելով, չեն ողջունում և չեն աջակցում այն փիլիսոփայությանը, որն ունի Տիգրան Սարգսյանը: Իրենք շատ լավ հասկանում են, որ Տիգրան Սարգսյանը դաշնակից չէ իրենց, թե ինչ է՝ չեմ ցանկանում հիմա չակերտները բացել, բայց այդ «պետական գործիչը» ստեղծողների դաշնակիցը չէ:

Mardik.am – Ըստ Ձեզ' ինչ հանգուցալուծում կստանա Րաֆֆի Հովհաննիսյանի պայքարը:

Գ. Արսենյան – Քաղաքական պայքարը շարունակական է, և քաղաքական կուսակցության ղեկավարը գնում է իր ճանապարհով, թե ուր կհասնի այդ ճանապարհով' ես չգիտեմ, բայց ես չեմ կարծում, որ այդ ճանապարհը պետք է ունենա ինչ-որ վերջակետ: Դա իրենց մարտավարության խնդիրն է' թե ինչ և ուր: Ճանապարհները լինում են միջակետերով և քաղաքական պայքարը միշտ շարունակվում է, քաղաքական գործիչներն էլ իրենց պայքարի ճանապարհին, լինում է, որ տեղը զիջում են հաջորդներին:

Mardik.am – Հարցազրույցի վերջում Ձեր խոսքը կասե՞ք Երևանի քաղաքացիներին:

Գ. Արսենյան – Քաղաքացիներին ես կասեմ, որ Դուք այսօր բացառիկ հնարավորություն ունեք ընտրելու՝ Երևանի կառավարումը ստանձնելու պատրաստ թիմ, որը կարող է ապացուցել, որ հնարավոր է արդյունավետ ու արդարացի կառավարում, որի արդյունքում շահում են բոլորը: