Tert.am-ի հետ զրույցում«Ժառանգության» փոխնախագահ Արմեն Մարտիրոսյանն անդրադարձել է ԵՄ-ի հետ նախաստորագրվելիք Ասոցացման համաձայնագրին, դրա վերաբերյալ կուսակցության դիրքորոշմանը,ինչպես նաև հարցին, թե ինչու ազատամարտիկների հանրահավաքին միացած Րաֆֆի Հովհաննիսյանն ու ինքը մասնակցում էին որպես շարքային մասնակիցներ:
-«Ժառանգություն» խմբակցության ղեկավար Ռուբեն Հակոբյանը ԵՄ ասոցացման համաձայնագրի հետ կապված որպես իր անձնական տեսակետ հայտարարեց, որ մոլորված են նրանք, ովքեր առանց ծանոթ լինելու Ասոցացման տեքստին, կողմ կամ դեմ են արտահայտվում: Մինչդեռ կուսակցությունում բոլորը մշտապես կողմ են արտահայտվել: Կա՞ այս առումով կոնսեսուս, և երբ է այս հարցի վերաբերյալ կուսակցության պաշտոնական որոշումը հստակեցնելու համար քննարկում լինելու:
-Ոչ մեկ անգամ հայտարարել ենք, որ եթե Ասոցացման համաձայնագրում Արցախի կամ հայ-թուրքական արձանագրությունների, հարաբերությունների հետ կապված վտանգավոր կետ չլինի և այն համապատասխանի Հայաստանի շահերին, մենք կողմ ենք: Կարծում եմ' հենց այդպիսին էլ կլինի Ասոցացման համաձայնագիրը: Ինչ վերաբերում է առհասարակ եվրոպական ուղղությանը, դա ամրագրված է կուսակցության ծրագրում, և այստեղ երկրորդ կարծիք լինել չի կարող: Կուսակցությունը հենց իր կանոնադրության մեջ նշում է, որ Եվրամիությունը արտաքին քաղաքականության վեկտորներից մեկն է: Եվ ԵՄ Ասոցացման համաձայնագիրն այդ ուղու մի մասն է կազմում: Այնպես որ, չեմ կարծում, որ հակասություն կա պարոն Հակոբյանի և մնացածների միջև: Եվ որոշ ժամանակ հետո, երբ ամբողջապես ծանոթ կլինենք համաձայնագրին, որովհետև այնպես չէ, որ ընդհանրապես որևէ տեղեկություն չունեմ և ասեմ, որ որոշակի պատկերացումներ կան համաձայնագրի վերաբերյալ, բայց , այնուամենայնիվ, երբ կլինի վերջնական տեքստը, մենք բոլորս կծանոթանանք, և եթե որևէ խնդրահարույց կետ չլինի, բոլորս կողմ կարտահայտվենք:
-Կուսակցությունում այդ հարցի հետ կապված կոնսեսուս կա՞։
-Այդպիսի խնդիր չկա, նորից եմ կրկնում'կուսակցության ծրագրում' արտաքին քաղաքականության բաժնում հստակ գրված է, որ ԵՄ ուղղությամբ եվրաինտեգրումը մեզ մոտ գերակա ուղղություն է:
-Պարոն Մարտիրոսյան, ի պատասխան հարցի, որ քաղաքական ու քաղաքագիտական շրջանակներից պարբերաբար մեսիջներ են հղվում իշխող կուսակցությանը, որ հրապարակայնացրեք տեքստը, Էդուարդ Շարմազանովը հայտարարեց, որ կգա ժամանակը, կիմանան, ինչպես դա լինում է միջազգային մյուս պայմանագրերը ԱԺ' վավերացման բերվելու ընթացակարգով: Համաձա՞յն եք, հետո ուշ չի՞ լինի:
-Իհարկե, ուշ չի լինի, և ընդամենը լինելու է նախաստորագրման փուլ: Երկրորդ. միջազգային պայմանագրերը մինչև ԱԺ- ի կողմից վավերացնելը անպայման անցնում են նաև Սահմանադրական դատարանով: Իհարկե, ինձ համար ցանկալի կլիներ, որ մինչև նախաստորագրումը տեքստը հրապարակվեր, բայց ցանկացած պարագայում կարծում եմ' մենք դեռ ժամանակ ունենք, և նախաստորագրումից հետո ընկած ժամանակահատվածը չեմ կարծում, որ մի քանի ժամ է լինելու: Ուստիև այդ ժամանակահատվածում էլ կարող ենք ծանոթանալ:
-Այսօր ՀՅԴ Հայ դատի հայաստանյան գրասենյակի պատասխանատու Կիրո Մանոյանը, ըստ էության, հաստատեց, որ ՀՅԴ-ականներ Վահան Հովհաննիսյանը և այլ դաշնակցականներ անցնելու են տարբեր երկրներում դիվանագիտական աշխատանքի: Հնարավո՞ր է , որ իշխանությունից նման առաջարկներ եղած լինեն «Ժառանգությանը» կամ ինչ-որ ժամանակ հետո լուրեր լսենք, որ ձեր կուսակցությունից այնինչն է գնում դեսպան:
-Նմանատիպ տեղեկատվություն չկա բացարձակապես որևէ անդամի հետ կապված, ուստի այս պահի դրությամբ ես հերքում եմ: Ինչ վերաբերում է Դաշնակցության պարագային, կարծում եմ' երբ կլինի այդ տեղեկատվության պաշտոնական հաստատումը, այդ ժամանակ այդ թեմայի շուրջ կարելի է խոսել:
-Ասում եմ, ապագայում հնարավո՞ր է , որ մի օր էլ լսենք, որ «Ժառանգությունից» ինչ-որ մեկին է առաջարկվել դեսպանի պաշտոն:
-Այնպիսի հետաքրքիր բան եք ասում. ապագայում հնարավոր է, որ «Ժառանգությունը» մեծամասնություն կազմի: Ապագայի համար ես ինչպե՞ս կարող եմ պատասխան տալ:
-Երբ Րաֆֆի Հովհաննիսյանն իր վերջին հանրահավաքին հայտարարեց, որ միանալու է ազատամարտիկների հանրահավաքին շատերը ենթադրեցին, որ կլինեն ելույթներ հարթակից, կոչեր և այլն, բայց Դուք շարքերում կանգնած ու մի կողմ քաշված լսում էիք:
-Մի կողմ քաշված չէինք, սովորական, մյուս քաղաքացիների նման հանգիստ կանգնած լսում էինք: Ինչ վերաբերում է ելույթին, մինչ այդ ես երկու անգամ ելույթ ունեցա: Այնպես որ, չեմ կարծում, որ առանձնակի խնդիր կար:
