Հայկական Վերածնունդ քաղաքացիական շարժումը հայտարարություն է տարածել, որում մասնավորապես ասված է.
«Հարգելի´ հայրենակիցներ,
Գերմանահայոց Կենտրոնական Խորհրդի ներկա ճգնաժամը համարում ենք շատ ցավալի երևույթ, որը, սակայն, չափազանց ուսանելի է շատերիս համար:
Այս ճգնաժամը խիստ մտահոգում է բոլոր այն նվիրյալ հայորդիներին, ովքեր անցյալում իրենց ազնիվ ներդրումով նպաստեցին Կենտրոնական Խորհուրդի կառուցմանն ու կայացմանը, տարիներով աշխատեցին նրա տարբեր ենթակառույցներում:
Ներկա զարգացումները, այնուամենայնիվ, խիստ ուսանելի են բոլոր այն գործիչների և համայնքայինների համար, ովքեր լծվելու են գերմանահայության քաղաքական ապագայի կառուցման գործին: Սույն զարգացումները ակնհայտորեն հուշում են մեզ, որ պետք է դուրս գալ սփյուռքյան բազմաթիվ կարծրատիպային կոնցեպտներից և անցնել լայնակի ժողովրդավար հայեցակարգերի մշակմանն ու առավել ժողովրդավար հիմքերի վրա դնել ներկա համայնքային կառույցները:
Ժողովրդավար ռազմավարությունը այսօրվա հրամայականն է:
Հայկական Վերածնունդ Շարժումը մերժում է որևիցե տեսակի քաղաքական և կուսակցական թելադրանք Գերմանահայոց Կենտրոնական Խորհուրդում և դատապարտում բոլոր այն ներքին և արտաքին ուժերին, որոնք փորձում են իրենց ազդեցության տակ պահել դեպի լայնակի ժողովրդավարության ձգտող Գերմանահայության Կենտրոնական Խորհրդը:
Մենք դատապարտում ենք Ազատ Օրդուխանյանի նկատմամբ սկսված վարկաբեկիչ արշավը և մեր զորակցությունը հայտնում նրա նորարարական ռազմավարությանը:
Խիստ ողջունելի է նրա անզիճող պայքարը թե´ Գերմանահայոց Կենտրոնական Խորհրդի առավելաչափ ժողովրդավարացման և թե´ Հայաստանի Հանրապետությունը հիմքից վտանգող հոռի բարքերի վերացման համար:
Կոչ ենք անում գերմանահայ համայնքի բոլոր անկախ անդամներին գիտակցել պահի լրջությունը և կողմորոշվել քաղաքական և կուսակցական թելադրանքների ենթարկված և անկախ Կենտրոնական Խորհորդի միջև:
Ժողովրդավարացումն է Գերմանահայոց Կենտրոնական Խուրհրդի գոյատևման և զարգացման միակ երաշխիքը:
1 դեկտեմբեր 2013թ.
Հայկական Վերածնունդ Շարժում՝
Ստորագրությամբ.
ՀՎ-Լոս Անջելեի մասնաճյուղ
ՀՎ-Փարիզի մասնաճյուղ
ՀՎ-Տորոնտոյի մասնաճյուղ
ՀՎ-Պրահայի մասնաճյուղ
ՀՎ-Լիբանանի մասնաճյուղ
ՀՎ-Գերմանիայի մասնաճյուղ
ՀՎ-Իտալիայի մասնաճյուղ
ՀՎ-Բելգիայի մասնաճյուղ»:
