Ինչպես հայտնի է, մայիսի 6-ի խորհրդարանական ընտրություններում Գյումրի քաղաքում հաղթեց ԲՀԿ-ն, ինչի արդյունքում ՀՀԿ-ական քաղաքապետ Վարդան Ղուկասյանը հրաժարական տվեց: Այսօր, սակայն, Գյումրիի ԲՀԿ-ականները հայտարարում են ՀՀԿ թեկնածու Սերժ Սարգսյանին սատարելու մասին: Գյումրիի թիվ 34 ընտրատարածքի ԲՀԿ պատասխանատու Մարտուն Գրիգորյանը, ով դարձավ ԱԺ գյուղատնտեսության և բնապահպանության հարցերի հանձնաժողովի նախագահ, ևս ասում է, որ ընտրելու է Սերժ Սարգսյանին: Հիշեցնենք, որ Գյումրիի ԲՀԿ-ական քաղաքապետ Սամվել Բալասանյանը հայտարարել է, որ սատարելու է Սերժ Սարգսյանին: Ներկայացնում ենք«Առաջին լրատվական»-ի զրույցը ԲՀԿ պատգամավոր Մարտուն Գրիգորյանի հետ:
- Գյումրիի ԲՀԿ-ական քաղաքապետ Սամվել Բալասանյանի հայտարարությունը, կարծում եք, Գյումրիի մյուս ԲՀԿ-ականների համար վարակիչ կլինի՞:
- Վարակիչի առումով ճիշտն ասած, չեմ կարող ասել, վարակիչ կլինի, թե ոնց, բայց կարող եմ մի բան ասել, որ ԲՀԿ-ն թեկնածու չի առաջադրել և հայտարարում է, որ ոչ մի թեկնածուի չի սատարում: Թե առանձին կուսակցականներ ոնց են որոշում, ինչ են անում, դա երևի ճիշտ կլինի հենց այդ մարդկանցից կամ կուսակցությունում հարցնել: Ես Գյումրու 34 ընտրատարածքի պատասխանատուն եմ, իսկ թե որ կուսակցականը Գյումրու որ հատվածում աշխատանք տանում է, թե չի տանում, մենք էդ կարգի խնդիր չենք դրել մեր առաջ: Ուղղակի քաղաքական հայտարարություն է արվել, որ կուսակցությունը թեկնածու չունի և ուրիշի չի պաշտպանում: Թե առանձին կուսակցականներ ինչ-որ բաներ անում են, էդտեղ հատուկ վերահսկողություն չենք սահմանում, թե ով ինչ է անում:
- Ասել է թե' բարձիթողի վիճա՞կ է: Փաստորեն, ԲՀԿ քաղխորհրդի որոշումը հեղինակություն չունի՞ ԲՀԿ-ականների մոտ, եթե կարող են չհետևել դրան:
- Գիտեք ինչ, դա յուրաքանչյուր մարդու սահմանադրական իրավունքն է: Մարդն ընտրության իրավունք ունի, և յուրաքանչյուր մարդ իր ցանկությամբ գնալու է ընտրության: Եթե մեր կուսակցությունն իր թեկնածուին կառաջադրեր, բնականաբար յուրաքանչյուրս ամեն ինչ անելու էինք մեր թեկնածուի համար, տուն առ տուն, փողոց առ փողոց գնալով, բայց քանի որ մենք թեկնածու չունենք, և այս ընտրությունները ԲՀԿ-ին այնքան էլ չեն հետաքրքրում, բնականաբար, էդ վիճակն է, քանի որ հետաքրքրություն մենք էստեղ չունենք: Եթե առանձին կուսակցականներ մտածում են, որ գործող նախագահին կամ մեկ ուրիշին պետք է պաշտպանեն, էստեղ ԲՀԿ-ն պատասխանատու չէ:
- Սակայն եթե կուսակցության քաղխորհրդի որոշումը հեղինակություն չէ կուսակցության անդամների համար, չե՞ք կարծում, որ նրանք պետք է լքեն կուսակցությունը:
- Իմ կարծիքով' 37 թվից արդեն անցել ենք մենք: 100 հազարավոր կուսակիցների հետևից ընկնենք, էդ մարդկանց վերահսկենք, դա մի կողմից անհնար է, մյուս կողմից' էդ սկզբունքը չի եղել: Էդպես դրված չէ, որ մենք, օրինակի համար, որ ԲՀԿ-ականները ընտրության չգնան, չընտրեն: Նման սկզբունք դրված չի եղել մեր առաջ: Մենք չենք հայտարարել, որ չգնան ընտրության, բոյկոտեն ընտրությունները:
- Իսկ Դուք գնալո՞ւ եք ընտրության, և հետաքրքիր է' ո՞ւմ եք ընտրելու:
- Ես՝ թե որպես ՀՀ քաղաքացի և թե որպես ԱԺ պատգամավոր, բնականաբար, չեմ կարող երկրի ամենակարևոր ընտրությանը չմասնակցել և իմ ընտրությունն ունեմ: Թեկնածուներին տեսնելով՝ շատ երկար մտածելու, կողմնորոշվելու բան չկա: Ես անձամբ որպես ընտրող, հաշվի առնելով Գյումրի քաղաքի հետ կապված երկրի նախագահի խոստումը, ընտրելու եմ Սերժ Սարգսյանին:
- Նաև' նշանակում է, սատարելո՞ւ եք իրեն:
- Ես ասացի միայն ընտրելու մասին: Դա իմ անձնական ընտրության հարցն է, ուրիշ ոչ մի բան:
- Եթե Դուք ԲՀԿ կառույցի ղեկավար եք էստեղ, փաստորեն սա ազդա՞կ է, և էստեղ կառույցի անդամները ևս կհետևեն Ձեր օրինակին:
- Ընտրությունն ազատ է, չի նշանակում, որ եթե ես ասում եմ, ընտրելու եմ Սերժ Սարգսյանին, մյուսները պարտավորված ընտրություն են անելու: Ես ունեմ իմ փաստարկները, թե ինչով պայմանավորված ես կընտրեմ Սերժ Սարգսյանին:
- Խորհրդարանական ընտրությունների ժամանակ ԲՀԿ-ն, նաև Ձեր ջանքերով, գրավեց Գյումրին, հիմա փաստորեն հե՞տ է տալիս ՀՀԿ-ին Գյումրին:
- Այն ժամանակ ԱԺ ընտրություններ էր, անհատներ, պատգամավորներ էին ընտրվում, կուսակցություն էր ընտրվում, իսկ սա երկրի նախագահի ընտրություն է, որտեղ ԲՀԿ-ն թեկնածու չունի: Իսկ այն ժամանակ ԲՀԿ-ն կար ընտրություններում, և մենք մեր ջանքերը ներդրել ենք, և էսօր էլ Գյումրու քաղաքապետը ԲՀԿ անդամ է, որը նաև պետք է աշխատի գործող նախագահի հետ, և էդ նախագահի շնորհիվ պետք է Գյումրի քաղաքի խնդիրները հարթեցվեն:
- Իսկ ինչո՞ւ եք կարծում, որ Րաֆֆի Հովհաննիսյանի կամ Հրանտ Բագրատյանի հետ հնարավոր չէր այդ հարցերն ավելի հեշտ կարգավորել:
- Գիտեք ինչ, ձեր թվարկած անձերի հետ կապված պետք է մեր երևակայությանը զոռ տայինք կամ մեր ռոմանտիկային զոռ տանք, թե հնարավոր է, հնարավոր չէ, կարող են, թե չեն կարող, արդեն փորձված օրինակը կա, տեսել ենք, որ գործող նախագահը հնարավորություն ունի այդ ամենը անելու: Իմ կարծիքով' գյումրեցիներն էդ կտրվածքով պետք է առաջնորդվեն:
- Սակայն Գյումրիում արտագաղթն ավելացել է և չի նվազել: Եթե գյումրեցիների համար ծրագրեր արվեին իրականում, որ իրոք արժանի լինեին վերաքվեարկության, կարծում եմ՝ արտագաղթը չէր ավելանա:
- Ոչ միայն Գյումրիում, ամբողջ Հայաստանում արտագաղթը կա: Հայաստանում շատ կան ծուռ բաներ, որ պետք է դզել: Էդ ամեն ինչի մասին մենք ասել ենք, էդ ամեն ինչին մենք տեր ենք, բայց կոնկրետ Գյումրու անօթևանների կտրվածքով խնդիրը հիմնականում լուծվել է: Թե չէ, էդ ամեն ինչը, տնտեսական ճգնաժամ և այլն, ոչ մեկը դրանից չի հրաժարվում, էդ ամեն ինչը կա:
- Ձեզ խորհրդարանում տրվեց ԱԺ գյուղատնտեսական և բնապահպանական հանձնաժողովի նախագահի պաշտոնը, և ասվում էր, որ դա որոշ պայմանավորվածության արդյունքում է եղել, հնարավո՞ր է դրա համար ուզում եք վարձահատույց լինել Սերժ Սարգսյանին:
- Բացարձակ, ես ոչ մի վարձահատույց լինելու խնդիր չունեմ: Ինձ գյուղատնտեսական հարցերի հանձնաժողովի նախագահ առաջադրել է ԲՀԿ նախագահ Գագիկ Ծառուկյանը, և ես իմ շնորհակալությունը հայտնել եմ պարոն Ծառուկյանին վստահության համար: Դրա համար պարտական եմ Գագիկ Ծառուկյանին:
- Սակայն, փաստորեն, Գագիկ Ծառուկյանի և կուսակցության քաղխորհրդի որոշումը Դուք էլ չեք կատարում:
- Այսի՞նքն: Կոնկրետ ես էս պահի դրությամբ շատ լավ կատարում եմ: Ընտրելը այլ բան է, սատարելն այլ բան է: Իսկ դուք ճշտե՞լ եք' Գագիկ Ծառուկյանը ո՞ւմ է ընտրելու, գնալո՞ւ է ընտրությունների Գագիկ Ծառուկյանը:
- Ես չեմ ճշտել, իսկ Դուք ճշտե՞լ եք:
- Չէ, չեմ ճշտել:
- Ասել է թե' հնարավոր է' Գագիկ Ծառուկյա՞նն էլ Սերժ Սարգսյանին ընտրի:
- Ես հարցնում եմ' տեղյա՞կ եք, յուրաքանչյուր կուսակցական, նախագահ, տեղակալ, գնալո՞ւ են ընտրության, ո՞ւմ են ընտրելու: Մենք ուղղակի թեկնածու չենք առաջադրել և սատարելու խնդիր չենք դրել, բայց թե ամեն մեկս ում ենք ընտրելու, դա արդեն մեր անձնական խնդիրն է:
