Ադրբեջանում մարդու իրավունքների կոպիտ ոտնահարման հետ կապված' Ադրբեջանի դեմ ԱՄՆ-ի կողմից հնչող կոչերի եւ հնարավոր պատժամիջոցներ կիրառվելու առնչությամբ ռուսաստանյան մամուլում կարծիքներ են շրջանառվում, որ ամերիկացիները կարող են իսլամի սունի ծայրահեղական վահաբիներին հանել Իլհամ Ալիեւի դեմ:
Ինչպես հաղորդում է «Արմենպրես»-ը, նման կարծիք է հայտնել ռուս քաղաքագետ եւ արեւելագետ Եվգենի Բախրեւսկին' lenta.ru լրատվական կայքում հրապարակած հոդվածում:
Վերլուծելով ԱՄՆ-ի եւ Ադրբեջանի կոռումպացված կառավարության միջեւ դիմակայության աղբյուրները, հատկապես, The New York Times թերթում հունվարի 12-ին հրապարակված' «Ադրբեջանից պարոն Ալիեւի երկու երեսը», որում Ադրբեջանի ավտորիտար նախագահին անվանել են «քաղաքական Ջեքիլ եւ Հայդ», Բախրեւսկին համոզմունք է հայտնել, որ չնայած վերջին տարիներին վահաբիները բավական ուժեղացել են Ադրբեջանում, սակայն, նրանք չեն կարող վիճակ փոխել այդ երկրում, քանի որ այնտեղ Իրանի ազդեցության տակ գտնվող լավ կազմակերպված շիա մեծամասնություն կա, եւ վահաբիները կարող են Ալ իեւի դեմ միայն որպես «խոյարահող ջոկատ» օգտագործվել:
«Կասկած չկա, որ Ադրբեջանի վրա ԱՄՆ-ի ճնշումները կշարունակվեն: Սակայն, Ադրբեջանում անհեռանկարային է բացառապես արեւմտամետ ուժերի վրա հենվելը, քանի որ այդ ուժերը խիստ նվազ են եւ ունակ չեն ակտիվորեն դիմակայել Ալիեւի վարչակարգին:
Ի տարբերություն Ուկրաինայում փորձարկված' ազատականների եւ ազգայնականների միությանը, ամենայն հավանականությամբ, Ադրբեջանում ամերիկացիների կողմից կարող է օգտագործվել ազատականների եւ վահաբիների դաշինքը: Վերջին տարիներին սրընթացորեն ուժեղացող վահաբիներն, այդուհանդերձ, իրավիճակն Ադրբեջանում ինքնուրույն փոխելու հնարավորություն չունեն, քանի որ նրանց դիմակայում է հզոր եւ բավականաչափ կազմակերպված ու զգալի աստիճանով Իրանի ազդեցության տակ գտնվող շիա մեծամասնությունը:
Սակայն, Ալիեւի վրա կարող են ազդել. որպեսզի նա ավելի հնազանդ ու լսող դառնա, վահաբիները կարող են օգտագործվել որպես «խոյահարող ջոկատ» (տարան), -նշել է ռուս քաղաքական վերլուծաբանը:
