Զարուհի Փոստանջյանի հայտարարությունը «Խորհրդարանական շաբաթ» հաղորդման շրջանակում
Տարիներ շարունակ հնչող գաղափարը՝ ամբողջական, համակարգային իշխանափոխությունը, դեռ չենք իրականացրել: Պատճառները տարբեր են' օբյեկտիվ և սուբյեկտիվ:
Կարծում եմ՝ օբյեկտիվ պատճառն այն է, որ քաղաքաքական ուժերը չեն կարողացել բավարար կազմակերպվել և ցուցադրել հավաքական կամք՝ միասնական օրակարգով, միասնական գործողություների ծրագրի ներքո:
Սուբյեկտիվը այն է, որ Հայաստանի Հանարապետության քաղաքացիները չեն գնահատել իրավունքի գերակայության համար մղվող երկար պայքարի անհրաժեշտությունը և յուրաքանչյուր քաղաքացու պատասխանատվությունն ու պարտականությունը:
Քաղաքացիական և քաղաքական իրավունքների համար մենք դեռ չենք ապրել մեր հայկական հեղափոխությունը:
1996 թվականից ի վեր մենք փորձել ենք ընդվզել միայն կեղծված նախագահական ընտրությունների դեմ, ինչը չի ունեցել հաջողություն:
1996 թվականի կեղծված նախագահական ընտրություններից հետո իշխանության բռնազավթումը Լևոն Տեր-Պետրոսյանի կողմից տևեց 3 տարի: 1998 թվականի կեղծված նախագահական ընտրություններից հետո իշխանության բռնազավթումը Ռոբերտ Քոչարյանի կողմից շարունակվեց 10 տարի, 2008 թվականի կեղծված նախագահական ընտրություններից հետո իշխանության բռնազավթումը Սերժ Սարգսյանի կողմից շարունակվում է առ այսօր:
Մեզ պատկանող իշխանությունն արդեն 20 տարի գտնվում է բռնազավթիչների ձեռքում:
20 տարի է Լևոն Տեր-Պետրոսյանի, Ռոբերտ Քոչարյանի և Սերժ Սարգսյանի կողմից իշխանության բռնազավթման փաստի վերաբերյալ մենք ազգովի հավաքական դատապարտման գործընթաց չենք նախաձեռնել, ինչը ծնել է շարունակական անպատժելիություն և իշխանության բռնազավթման որկրամոլություն:
Որկրամոլ Սերժ Սարգսյանը, չկարողանալով զսպել իր կողմից իշխանության բռնազավթման ախորժակի պահանջը, «Սահմանադրական բարեփոխումներ» ծխածածկույթի ներքո ցանկանում է ևս երկարաձգել իշխանության բռնազավթումը:
Սերժ Սարգսյանի կողմից նախաձեռնված Սահմանադրական բարեփոխումները ենթադրում են համապետական ընտրական գործընթաց, որին հայ հանրությունը դեմ է և այդ դեմ լինելու գործընթացը պետք է դրսևորվի կազմակերպված դիմադրությամբ, որի արդյունքը պետք է լինի համակարգային իշխանափոխություն՝ Սերժ Սարգսյանի պաշտոնանկությամբ և ՀՀ Ազգային Ժողովի լուծարմամբ:
«Ժառանգությունը» շարունակում է պայքար մղել համակարգային իշխանափոխության համար և հրավիրում է հերթական հանրային հանդիպմանը, որը կկայանա սույն թվականի մարտի 20-ին, ժամը 17:00-ին Ազատության հրապարարակում:
