ՀԱՊԿ գլխավոր քարտուղար Նիկոլայ Բորդյուժան Պարույր Հայրիկյանի հետ կատարվածը մահափորձ չի համարում: Նա ասել է, որ դեռ պետք է պարզել՝ արդյոք դա մահափորձ էր:
Հայրիկյանը տեղի ունեցածի մեջ գրեթե ուղղակի մեղադրել է ռուսական հատուկ ծառայություններին՝ նշելով, որ դա կապում է իր հայտարարությունների հետ, ըստ որոնց Հայաստանի եվրոպական ուղին այլընտրանք չունի: Ռուսաստանը դեռեւս չի պատասխանել այդ ծանր մեղադրանքին, եթե պատասխան չհամարենք Բորդյուժայի հայտարարությունը, ով փաստորեն ասել է, որ Հայրիկյանին ցանկացել են ոչ թե սպանել, այլ վախեցնել նրան կամ մեկ ուրիշի:
Որքան էլ փորձեցին այնպես անել, որ նախընտրական արշավի ժամանակ արտաքին քաղաքական կողմնորոշման հարցը երեւան չգա, այդպես էլ չստացվեց: Այդ հարցն այնքան հիմնարար է, որ չէր կարող գլխավոր չդառնալ: Ցավոք, բանավեճն «արտահայտվեց» մարդու դեմ մահափորձով, եւ փորձագետների կարծիքով, կրակոցները կարող են շարունակվել:
Հատկանշական է, որ Շոյգուի ու Բորդյուժայի այցից ու աղմկոտ հայտարարություններից հետո Հայաստանի իշխանություններն այդպես էլ հստակ ոչ մի բան չեն հայտարարել: Հայտարարությունների բացակայությունը նույնպես քաղաքականություն է: Հայաստանը, փաստորեն, մերժել է Ռուսաստանին Ղարաբաղ ու Իրանի սահման զորքեր մտցնելու հարցում:
Հնարավոր է, այդ հարցը պետք է լուծվեր ընտրություններից անմիջապես հետո: Արդեն ակնարկներ են եղել, որ փետրվարի սկզբին Հայաստան կայցելի Վլադիմիր Պուտինը, ով «անվտանգության լրացուցիչ տարրեր» պարունակող ռազմատեխնիկական նոր համաձայնագիր կստորագրի Հայաստանի հետ: Ենթադրվում է ռուսական զորքերի մուտք Ղարաբաղ (օդանավակայան) եւ ռուսական «խաղաղարարների» տեղակայում Իրանի հետ սահմանին:
Հնարավոր է, համաշխարահային բարձր շրջանակներում արդեն որոշակի ժամկետներ են սահմանվել Սիրիայի դեմ ռազմական գործողությունների հարցում, ինչը ենթադրում է Իրանի միջամտություն ու ճակատի տեղափոխում դեպի Իրան: Հավանական է նաեւ, որ Իսրայելը պարզապես տեղեկատվական սադրանք է իրականացնում, որպեսզի «կոտրի» Իրանին: Ամեն դեպքում, Ռուսաստանն անում է ամեն ինչ, որ մինչ այդ հայտնվի Ղարաբաղում:
Սերժ Սարգսյանը հայտնվել է բարդ իրադրությունում, եւ նրան, ըստ ամենայնի, շատ էր անհրաժեշտ հետաձգել ընտրությունները, որպեսզի որոշում չընդունի ռուսական խաղաղարարների մուտքի մասին: Իսկ նման որոշում կարող էր պարտադրվել նաեւ Հայաստանում ստեղծված անկայուն քաղաքական իրավիճակում: Պատահական չէ, որ ընտրությունները երկու շաբաթով հետաձգելու որոշումը Հայրիկյանն ընդունել է Սերժ Սարգսյանի հետ հանդիպումից հետո:
Հայրիկյանը դիմելու է Սահմանադրական դատարան, քվեարկության օրը երկու շաբաթով հետաձգելու համար: Ի դեպ, այս կապակցությամբ, ԱՄՆ Պետական դեպարտամենտի հայտարարության մեջ նշվում է, որ Վաշինգտոնը հասկանում է, որ քվեարկությունը կարող է հետաձգվել, եւ կոչ է արվում ՀՀ իշխանությանը՝ գործել Սահմանադրությանը համապատասխան:
Ի՞նչ պետք է տեղի ունենա փետրվարի 18-ից մինչեւ մարտի 4-ը, ինչի՞ց է զգուշանում Սերժ Սարգսյանը, հասկացե՞լ է Պարույր Հայրիկյանը սպառնալիքը՝ դժվար է ներկայում մեկնաբանել: Սակայն հազիվ թե դա կապված լինի միայն ներքին քաղաքական գործընթացների հետ: Բանը գլոբալ քաղաքականության մեջ է, եւ ամենայն հավանականությամբ երկու շաբաթն անհրաժեշտ է Հայաստանը տարածաշրջանային խոշոր ցնցումների մեջ չներքաշելու համար:
