«Խոսքը հանուն կյանքի» խորագրով ապրիլի 20-29-ը Երևանում կանցկացվի «Գրական տապան» միջազգային ամենամյա փառատոնը' «Գրական տապան. ապրիլ» ծրագրով: Այն նվիրված է Հայոց ցեղասպանության 100-րդ տարելիցին: Ինչպես «Արմենպրես»-ին տեղեկացրին փառատոնից, գրական այս նախաձեռնությունն ընթերցասեր հանրությանը կծանոթացնի Հայոց ցեղասպանության թեմայով հրատարակված օտարալեզու ստեղծագործությունները, որոնց հեղինակներին էլ կհյուրընկալի փառատոնը:
«Գրական տապան. ապրիլ»-ը կմեկտեղի հայ և օտարազգի գրողների ստեղծագործ գաղափարները՝ ուղղելով դեպի Հայոց ցեղասպանությանը զոհ դարձած մեր մտավորականների խոսքի ու գրի հանրահռչակմանը։ Ապրիլի 21-ին նախատեսված է համատեղ գրական ընթերցում. հայ և օտար գրողները կընթերցեն Սիամանթոյի, Դանիել Վարուժանի, Գրիգոր Զոհարապի, Ռուբեն Սևակի և ցեղասպանության զոհ մեր մյուս գրողների ստեղծագործություններն ու դրանց թարգմանությունները: Այս ձեռնարկով Հայաստանը միանում է Հայոց ցեղասպանության 100-րդ տարելիցին նվիրված համաշխարհային գրական ընթերցումներին, որ ոնք նախաձեռնել են Բեռլինի պոեզիայի փառատոնը և Գերմանիայի «Լեփսիուսի տուն» հետազոտական կենտրոնը:
«Գրական տապան. ապրիլ»-ը կհյուրընկալի միջազգային գրական աշխարհում հեղինակություն ունեցող մտավորականների, ինչպիսիք են Թոմաս Հարթվիգը, Մելինե Թումանին, Յուրգեն Յանկովսկին, Մարկ Մուստյանը, Մարկ Մորտեն և այլք: Այս գրողները ստեղծագործել են նաև Հայոց ցեղասպանության թեմայով, նրանց գրքերը թարգմանվել են տարբեր լեզուներով՝ միջազգային հանրությանն իրազեկելով 20-րդ դարասկզբի մարդկային մեծագույն հանցանքի մասին։ Այդ գրքերի մի մասը թարգմանվել է նաև հայերեն, մասնավորապես' Մարկ Մուստյանի «Ժանդարմը» գիրքը, որի շնորհանդեսը նախատեսված է &laq uo;Գրական տապանի» օրերին։
Փառատոնի պատվավոր հյուրը կլինի ֆրանսիացի հանրաճանաչ գրող Բերնար Վերբերը, որի պատմվածքների հայերեն թարգմանությունը կներկայացվի ընթերցողին:
«Գրական տապան. ապրիլ» փառատոնին հյուրընկալված մտավորականները կմասնակցեն ապրիլի 22-23-ին Երևանում անցկացվող «Ընդդեմ ցեղասպանության հանցագործության» ֆորումին, որի ընթացքում կազմակերպվող «Ցեղասպանությունը գրականությունում» տաղավարում կներկայացնեն թեմային վերաբերող իրենց գրքերը:
Մտավորականները կանցկացնեն վարպետության դասեր, հայ ուսանողներին կներկայացնեն ժամանակակից գրական աշխարհի միտումներն ու զարգացումները։ Ավանդույթի համաձայն՝ նրանք կմասնակցեն կլոր սեղանների, քննարկումների, մշակութային այլ նախաձեռնությունների։
Փառատոնի հյուրերը կայցելեն Հայաստանի տեսարժան վայրեր, թանգարաններ,կծանոթանան մեր պատմամշակութային ժառանգությանն ու ավանդույթներին
«Գրական տապան. ապրիլ» միջազգային փառատոնն իրականացնում է Արտասահմանյան երկրների հետ մշակութային համագործակցության հայկական հասարակական կազմակերպությունը (ԱՕԿՍ)' ՀՀ մշակույթի նախարարության և Հայոց ցեղասպանության 100-րդ տարելիցին նվիրված միջոցառումները համակարոգող պետական հանձնաժողովի աջակցությամբ:
