Հայաստանի Հանրապետությունում Ֆրանսիայի դեսպանատունը հետևում է Հայաստանում ընթացող զարգացումներին և ցանկանում, որ երկխոսության ճանապարհով հնարավորինս արագ լուծում գտնվի էլեկտրաէներգիայի թանկացման խնդրին, որն ընդունելի կլինի բոլորի համար: «Արմենպրես»-ի փոխանցմամբ' հունիսի 29-ին լրագրողների հարցին ի պատասխան այս մասին հայտնեց ՀՀ-ում Ֆրանսիայի արտակարգ և լիազոր դեսպան Ժան-Ֆրանսուա Շարպանտիեն: «Մեր սովորությունների մեջ չի մտնում, և մենք մեզ իրավունք չենք վերապահում մեկնաբանություններ տալ օտար, ինքնիշխան երկրի ներքին քաղաքականությանն առնչվող հարցերի վերաբերյալ: Անշուշտ, մենք հետևում ենք ընթացող զարգացումներին: Իրադարձություն, որը մտնում է ժողովրդավարական գործընթացների ընդհանուր տրամաբանության մեջ: Բնական է, որ մարդիկ պահանջներ են առաջ քաշում: Բնական է նաև, որ իշխանությունները ձգտում են պահպանել հասարակական կարգը: Միակ բանը, որ մենք ցանկանում ենք, որ հնարավորինս արագ լուծում գտնվի՝ երկխոսության ճանապարհով: Լուծում, որն ընդունելի կլինի բոլորի համար և տնտեսական տեսանկյունից կենսունակ կլինի»,- նշեց ֆրանսիացի դիվանագետը:
Լրագրողների դեմ կիրառված բռնությունների մասին հարցին դեսպանը պատասպանեց. «Որքանով, որ ես իրազեկված եմ' բոլոր բերման ենթարկվածներն ազատ են արձակվել»:
