Այսօր` մարտի 30-ին, տեղի ունեցավ ՀՀ գյուղատնտեսության նախարար Իգնատի Առաքելյանի մամուլի ասուլիսը: Գարնանային աշխատանքները սկսվել են, նախարարը ներկայացրեց նախարարության իրականացրած աշխատանքները և առաջիկա ծրագրերը, այնուհետև պատասխանեց լրագրողների հարցերին: 

ԼՈւՐԵՐ.com-ի թղթակցի հարցին՝ ինչպե՞ս է վերաբերում քարոզարշավին, որ քաղաքական ուժի ծրագրերն են իրատեսական գյուղատնտեսության ոլորտի համար, Իգնատի Առաքելյանը նշեց, որ ինքը չէ, որ պետք է գնահատի որևէ կուսակցության քարոզարշավը. «Եթե ես չեմ մասնակցում, չեմ կարող գնահատական տալ»,- ասաց նա՝ ավելացնելով. «Այն ծրագրերը, որոնք մենք ներկայացրել ենք մինչ քարոզարշավը, բնակչությունը թող գնահատի: Մենք վեց ամսվա ընթացքում իրականացրել ենք երկու ծրագիր՝ որոնք նախատեսված չէին՝ առանց բյուջեից լրացուցիչ գումար վերցնելու»: 

Անդրադառնալով հարցին՝ ո՞ր կուսակցության ծրագրերն են իրատեսական գյուղատնտեսության ոլորտի համար, նախարարն ընդգծեց, որ գյուղատնտեսությունն այնքան պարզ է, որ բոլոր ծրագրերը նման են իրար՝ «էժան վարկ, սուբսիդավորում, որոնք այսօր արվում են»:

Անդրադառնալով հարցին՝ գյուղմթերքի իրացման հետ կապված խնդիրներից գյուղացիները դժգոհում են՝ նշելով, որ նույնիսկ ինքնարժեքը չեն կարողանում ստանալ, Իգնատի Առաքելյանը պատասխանեց.

«Դա գրեթե ամենամեծ խնդիրն է, որը հիմա ունենք, և որի լուծումն ունենք, միջոցը չունենք: Մենք մտածում ենք վերամշակողների համար ներդնել էժան վարկային ռեսուրս, որը կուղղվեր զուտ մթերմանը: Այս պահին մենք գումարի սղություն ունենք, այն, ինչ որ տնտեսել և դրել ենք, կտեսնենք: Ամեն դեպքում՝ ծրագիրը գրված է, որ կարողանանք մթերման այդ շրջանում թեթևացնենք գյուղացիների բեռը: Բոլոր դեպքերում՝ մենք ուզում ենք ստեղծել էժան ֆինանսական ռեսուրս՝ մթերողների համար», – նշեց նախարարը՝ ավելացնելով, որ կտեսնեն՝ կարողանո՞ւմ են այդ միջոցները հայթայթել, թե՝ չէ:

Խոսելով մթերողին տրամադրվող վարկային ռեսուրսների մասին, նախարարը նշեց, որ իրենց ծրագիրը նախատեսում էր մթերողին տալ 2-3 տոկոս վարկային ռեսուրս՝ այն պայմանով, որ 3 օր հետո գյուղացին ստանար այդ գումարը և գումարը փոխանցվելու էր անմիջապես գյուղմթերք իրացնողին:

Սոնա Հարությունյան