Երեկ հրավիրված մամուլի ասուլիսից անմիջապես հետո Կառավարության ղեկավարը մեկնեց Տաշքենդ՝ մասնակցելու ԱՊՀ կառավարությունների ղեկավարների խորհրդի նիստին:
Ուզբեկստանում վարչապետը հանդիպում է ունեցել իր ուզբեկ գործընկերոջ հետ՝ ձեռք բերելով պայմանավորվածություններ: Այս հանդիպումից զատ վարչապետը մասնակցել է նաև ԱՊՀ կառավարությունների ղեկավարների նեղ կազմով նիստին, որի ժամանակ էլ, մեղմ ասած, զավեշտալի միջադեպ է արձանագրվել:
Կառավարության կայքում հրապարակված լուսանկարներից պարզ է դառնում, որ մեր վարչապետի առջև դրվել է ոչ թե Հայաստանի Հանրապետության, այլ Կոլումբիայի դրոշը:
Դեռ պարզ չէ, սա կազմակերպչական վրիպակ է, թե ոչ, բայց որ կատարվել է անթույլատրելին, դա փաստ է:
Հետաքրքիր է՝ վարչապետն է՞լ չէր նկատել, որ իր առջև դրել են ոչ թե ՀՀ-ի, այլ Կոլումբիայի դրոշը...
Հավանաբար, սա չեն նկատել նաև Կառավարության մեր գործընկերները՝ հակառակ պարագայում այս լուսանկարը չէին հրապարակի` այն էլ Կառավարության պաշտոնական էջում:
