Սիրում եք վազել, սակայն սուղ են ֆինանսական միջոցներն ու պրոֆեսիոնալ մարզչի մոտ մարզվելու ժամանակը. Երևանում անվճար վազքի հատուկ պարապմունքներ են բացվելու: «Օգնության կամուրջ» հիմնադրամը (Relief Bridge Foundation) «Վազորդ» ակումբի հետ համատեղ կազմակերպում է վազքի պարապմունքներ: Այս մասին հաղորդում է հիմնադրամի ֆեյսբուքյան էջը: Պարապմունքները բաց են և անվճար բոլոր ցանկացողների համար։ Վազքի մարզումներին կարող են միանալ ինչպես սկսնակները, այնպես էլ փորձառու վազորդները։ Պարապմունքներն անցկացվում են շաբաթական 2 անգամ՝ երկուշաբթի և հինգշաբթի օրերին՝ երեկոյան ժամը 7-ից։
Վազորդներին կմարզի մարզիչ Հայկ Միրզոյանը, ով ունի ՈւԵՖԱ-ի կողմից հավատարմագրված ֆուտբոլի մարզական Բ կարգի լիցենզիա, ինչպես նաև մեծահասակների և երեխաների համար ֆուտբոլի և աթլետիկայի մարզումներ անցկացնելու մեծ փորձ:
Այս ծրագրով «Օգնության Կամուրջ» հիմնադրամը և «Վազորդ» ակումբը նպատակ ունեն խրախուսել բոլորին ապրել առողջ կենսակերպով, զարգացնել վազքի սպորտը Հայաստանում, ինչպես նաև վերացնել սպորտով զբաղվելու ֆինանսական խոչընդոտները։ «Օգնության Կամուրջ» հիմնադրամը մտադիր է հետագայում ֆինանսավորել նման մարզումները նաև Հայաստանի այլ մարզերում։
Նախնական 2 տեղանքներն են Կոմիտասի այգի (հինգշաբթի օրերին - և Մանկական այգի (երկուշաբթի օրերին): Հետագայում դրանք կավելացվեն:
