Անձնագրային և վիզաների վարչության պետ, հավանաբար, կնշանակվի Երևանի քաղաքապետարանի աշխատակազմի քարտուղար Վահե Խաչատրյանը: ԼՈՒՐԵՐ.com-ի տեղեկություններով՝ ոստիկանության շենքում մտերմիկ զրույցներում հենց Խաչատրյանն է այսպիսի արտահայտություն արել:
ԼՈՒՐԵՐ.com-ի հետ զրույցում Վահե Խաչատրյանն ասաց, որ այդ մասին առաջին անգամ է լսում. «Անկեղծ եմ ասում, նման բան չի եղել, ձեզանից եմ լսում: Ես իմ աշխատանքն եմ կատարում, որևէ տեղեկություն չունեմ այդ մասին»‚− նշեց նա:
Հարցին, թե Անձնագրային և վիզաների վարչության պետի պաշտոնը զբաղեցնելու առաջարկ ստանալու դեպքում կընդունի՞՝ ի պատասխան Խաչատրյանն ասաց. «Չեմ մտածել այդ ուղղությամբ, ես հիմա աշխատում եմ որպես համայնքային ծառայող»,- ասաց Խաչատրյանը:
Երկար տարիներ համակարգում աշխատած Վահե Խաչատրյանը ՀՀԿ-ական, նախկին ոստիկանապետ Ալիկ Սարգսյանի փեսան է: 2018 թվականին Հայաստանում տեղի ունեցած իշխանափոխությունից հետո այն ժամանակ ոստիկանապետի պաշտոնը զբաղեցնող Վալերի Օսիպյանը ազատեց նրան պաշտոնից՝ որպես Ալիկ Սարգսյանի հետ կապակցված անձ: Խաչատրյանն էլ տեղափոխվեց քաղաքապետարան և փաստորեն այժմ կրկին վերադառնում է ոստիկանություն:
