Նոր տիպի կորոնավիրուսի իրավիճակը Հայաստանում էականորեն բարելավել է և վերջին 4-5 օրերի տվյալներով` մենք կարող ենք ասել, որ կորոնավիրուսի ամենօրյա նոր դեպքերի թվով մենք, եթե կարելի է ասել, վերադարձել ենք մայիսի վերջին մակարդակին, ծանր հիվանդների թվով վերադարձել ենք մայիսի վերջին մակարդակին և ծայրահեղ ծանր թվով հիվանդների մակարդակով վերադարձել ենք հունիսի սկզբի մակարդակին: Այս մասին պարետատան նիստից հետո կայացած ճեպազրույցում ասաց ՀՀ վարչապետ Նիկոլ Փաշինյանը:
«Իհարկե, այս համեմատությունը հարաբերական է, քանի որ, ցավոք սրտի, ծանր և ծայրահեղ ծանր հիվանդների վիճակագրությունը նվազել է ոչ միայն բուժումների, այլ նաև մահվան դեպքերի պատճառով: Այսօրվա դրությամբ Հայաստանում 723 մահ է գրանցվել կորոնավիրուսից»,- ասաց վարչապետը և ցավակցություն հայտնեց բոլոր մահացածների ընտանիքներին և հարազատներին:
Փաշինյանը նշեց, որ ակնհայտ է` Հայաստանում կորոնավիրուսի հաղթահարման փուլ է սկսվել և այդ բարելավումը կապված է կառավարության ձեռնարկած հակահամաճարակային միջոցառումների հետ:
