Գյումրիում 2022 թվականին նախատեսվում է իրականացնել 5 սուբվենցիոն ծրագիր: Գյումրի քաղաքապետարանը կառավարությանն է ներկայացրել 5 սուբվենցիոն ծրագիր, որոնց ընդհանուր արժեքը գնահատված է 2 մլրդ 975 մլն 462 հազար դրամ։ Ծրագրերից մեկով առաջարկվում է 15 մեկ սենյականոց բնակարան ձեռք բերել, վերանորոգել և հատկացնել անօթևան ընտանիքներին։
Գյումրիի 11 մանկապարտեզի վերանորոգումները ևս ընդգրկված են այս տարվա սուբվենցիոն ծրագրերում։ Շենքերն ունեն ինչպես կոսմետիկ վերանորոգումների, այնպես էլ ջեռուցման համակարգերի նորացման, խոհանոցային պայմանների բարելավման կարիք; Ծրագրի ընդհանուր արժեքը կազմում է 105 միլիոն դրամ, որից՝ 31 միլիոն 500 հազար դրամը համաֆինանսավորման տեսքով ներդնում է համայնքը:
Սուբվենցիոն փաթեթում ֆինանսական առումով ծախսատար ծրագիրը ճանապարհաշինականն է, այս տարի նախատեսել են աշխատանքներ կատարել 22 փողոցում՝ ընդհանուրը 8250 մետր երկարության։ Ծրագրի ընդհանուր արժեքը կազմում է 1 միլիարդ 935 միլիոն 752 դրամ, որից՝ 1 միլիարդ 64 միլիոն 663 հազար 600 դրամը համաֆինանսավորման տեսքով ներդնում է համայնքը:
Եվս մեկ սուբվենցիոն հայտով էլ 4 բազմաբնակարան շենքեր կօգտվեն էներգաարդյունավետության արդիականացման ծրագրից։ Նախատեսվում է հիմնանորոգել նաև Մարիամ եւ Երանուհի Ասլամազյան քույրերի պատկերասրահի փայտյա պատշգամբը, Գյումրու Ստ. Ալիխանյանի անվան տիկնիկային թատրոնը:
