Մարդու իրավունքների պաշտպանն այսօր՝ հուլիսի 18-ին, հրապարակել է ՀՀ Արարատի մարզի Երասխ բնակավայրի ուղղությամբ ադրբեջանական զինված ուժերի գնդակոծությունների հետեւանքով մարդու իրավունքների շարունակական խախտումների վերաբերյալ արտահերթ զեկույց:
Փաստաթղթում ներկայացվում են Պաշտպանի կողմից Երասխ բնակավայրում իրականացված փաստահավաք աշխատանքների արդյունքներով արձանագրված մարդու հիմնարար իրավունքների խախտումները։
Զեկույցում հավաքագրվել եւ վերլուծվել են 2023 թվականի հունիսին բնակավայրի ուղղությամբ ադրբեջանական զինված ուժերի կրակոցների հետեւանքով մարդու իրավունքների խախտումները, ինչպես նաեւ ներկայացվում է մարդու իրավունքների պաշտպանությանը վերաբերելի խնդիրները լուծելու համար առաջարկությունների փաթեթ։
2023 թվականի հունիսի 13-14-ին ադրբեջանական մարտական դիրքերից կրակահերթեր են արձակվել Երասխ բնակավայրի ուղղությամբ, հատկապես ինտենսիվ ու թիրախային գնդակոծության է ենթարկվել Երասխում օտարերկրյա ներդրումներով կառուցվող մետալուրգիական գործարանը: Կրակոցների հետեւանքով վիրավորում է ստացել եւ բժշկական կենտրոն տեղափոխվել Հնդկաստանի երկու քաղաքացի։
Ադրբեջանական զինված ուժերի գործողությունների հետեւանքով խախտվել են խաղաղ բնակչության կյանքի, հոգեկան եւ ֆիզիկական անձեռնմխելիության, սեփականության, կրթության, աշխատանքի, ձեռնարկատիրությամբ զբաղվելու եւ մի շարք այլ հիմնարար իրավունքները։
Արտահերթ զեկույցը թարգմանվելու է անգլերեն լեզվով եւ ուղարկվելու մարդու իրավունքների պաշտպանության միջազգային մանդատ ունեցող կազմակերպություններին եւ դերակատարներին, պետական իրավասու գերատեսչություններին։
