Շիրակի մարզի ընդհանուր իարավասության դատարանում Կարեն Եսայանի սպանության գործով ցուցմունք է տվել Գյումրու նախկին քաղաքապետ Վարդան Ղուկասյանը: Դատական նիստից հետո ամբաստանյալի հայրը' Անիի նախկին ոստիկանապետ Սամվել Սարգսյանը, նախաինֆարկտային վիճակով տեղափոխվել է Գյումրիի բժշկական կենտրոնի կարդիովերակենդանացման բաժին: Այս մասին գրում է թերթը' հավելելով, որ ըստ մամուլում տարածված տեղեկությունների' Վարդան Ղուկասյանն ու նրա կողմանկիցները դատական նիստից հետո հարվածել են ամբաստանյալի հորը: Ամբաստանյալ Հ.Սարգսյանի պաշտպան Լ.Սահակյանի խոսքով' բռնությունը եղել է դատարանի դահլիճից դուրս, սակայն դատարանի շենքում: Լ.Սահակյանը դիմել է դատախազություն: «Քանի որ Վարդան Ղուկասյանը անհարգալից վերաբերմունք է դրսևորել դատարանի նկատմամբ, նաև ինձ վիրավորելով' խնդրել եմ քրեական գործ հարուցել»,- ասել է պաշտպան Լ.Սահակյանը: Թերթի տեղեկացմամբ' Վարդան Ղուկասյանը մոտ 30 հոգանոց շքախմբով է գնացել դատարան' պահանջելով որ լրագրողները լքեն դահլիճը: Գյումրիի ոստիկանությունում դատարանում կատարվածի փաստով քրեական գործ չի հարուցվել: «Մենք դեպքը գրանցել ենք, բայց այլ տեղեկություններ չունենք, որովհետև քաղաքացին հայտարարություն չի տվել»,- ասել է Շիրակի մարզի ոստիկանապետ Կարեն Բաբակեխյանը: Հոդվածն ամբողջությամբ կարդացեք «Ժամանակ» օրաթերթի' 17.07.2013թ. համարում: