«Արարատի նորանշանակ մարզպետ Արամայիս Գրիգորյանը, ինչպես մեր պաշտոնյաների բացարձակ մեծամասնությունը, շատ ազնիվ է և ունի հումորի բացառիկ զգացում: Դա պարզվել է երեկ «Հայկական ժամանակ» օրաթերթի թղթակցի երկու հարցերին նրա տված կարճ պատասխաններից: «Մարզպետ նշանակվելը ինչպե՞ս կազդի ձեր բիզնեսի վրա»,- երեկ կառավարության նիստից հետո հարցրել է թերթի թղթակիցը (Արամայիս Գրիգորյանը «Ավշարի» սեփականատերն է):
«Ես այժմ որևէ բիզնեսով չեմ զբաղվում: Բնականաբար, անցնելով պետական աշխատանքի, զբաղվելու եմ պետական գործունեությամբ»,- շատ ազնվորեն ասել է նորանշանակ մարզպետը՝ հավելելով, որ այլևս «Ավշարի» սեփականատերը չէ: Եվ ուրեմն ապրելու եք աշխատավարձո՞վ: «Այո»,- նույնքան ազնվորեն պատասխանել է մարզպետը: Իսկ ի՞նչ է արել Արամայիս Գրիգորյանը, «Ավշարի» բաժնետոմսերը վաճառե՞լ է՝ հարցրել է թղթակիցը:
«Այո, վաճառել եմ քեզ»,- հումոր է արել նորանշանակ մարզպետը»: Մանրամասները՝ թերթի այսօրվա համարում:
