ՀՀ ոստիկանությունը ձերբակալել է հունվարի 31-ին Թաիրովի թիվ 128 հասցեում գտնվող գիշերային ակումբի մոտ տեղի ունեցած վիճաբանության ժամանակ հրազենային վնասվածք պատճառած քաղաքացուն: Ինչպես տեղեկացնում են ՀՀ ոստիկանության հասարակայնության հետ կապերի և լրատվության վարչությունից, փետրվարի 1-ին' ժամը 18.00-ին, ՀՀ ոստիկանության ծառայողները Արմեն Հ.-ին հայտնաբերել են Բագրատաշենի սահմանային անցակետում և բերման ենթարկել ոստիկանության Վաղարշապատի բաժին:

Վերջինս տվել է խոստովանական ցուցմունք և ներկայացրել հանցագործության գործիք «ՏՕԶ» տիպի, առանց գործարանային համարի թմբուկավոր ատրճանակը' լիցքավորված 5.6 մմ տրամաչափի 3 չկրակված փամփուշտներով և կրակված փամփուշտի 2 պարկուճներով: Նշանակվել են փորձաքննություններ: Արմեն Հ.-ն ձերբակալված է: Նախաքննությունը շարունակվում է:

Հունվարի 31-ին' ժամը 07.00-ին, հիվանդանոցից ոստիկանության Վաղարշապատի բաժնում հաղորդում էր ստացվել, որ Թաիրովի թիվ 128 հասցեում գտնվող գիշերային ակումբի դիմացից, ձախ ազդրի ծակած վերքերով, բուժօգնության է տեղափոխվել 1978թ. ծնված Հարություն Զ.-ն: Դեպքի վայրի զննությամբ հայտնաբերվել էր «ՏՕԶ» հրազենի 5,6 մմ տրամաչափի չկրակված 3 փամփուշտ և փամփուշտի 1 գնդակ: Նշանակվել էր դատաբժշկական փորձաքննություն: Փաստի առթիվ ՀՀ քրեական օրենսգրքի 113 հոդվածի և 235 հոդվածի 1-ին մասի հատկանիշներով հարուցվել էր քրեական գործ:

Ձեռնարկված օպերատիվ-հետախուզական միջոցառումներով պարզվել է, որ հունվարի 31-ին' ժամը 04.30-ի սահմաններում, գիշերային ակումբի դիմաց, վիճաբանության ժամանակ, 1984թ. ծնված Արմեն Հ.-ն բռունցքով հարվածել և դեմքի շրջանում վնասվածք է պատճառել 1982թ. ծնված Մկրտիչ Ս.-ին, այնուհետև իր մոտ ապօրինի պահվող «ՏՕԶ» տիպի թմբուկավոր ատրճանակից կրակել և մարմնական վնասվածք է պատճառել Հարություն Զ.-ին