Ադրբեջանական կողմի հետ ընթացող բանակցություններն ավարտվել են, եւ հայ-ադրբեջանական զինված ուժերի շփման գծում Ադրբեջանի սահմանը հատած ՀՀ քաղաքացի Արսեն Խոջոյանն արդեն Հայաստանում է: «Արմենպրես»-ի հետ զրույցում ՀՀ պաշտպանության նախարարության մամուլի խոսնակ Արծրուն Հովհաննիսյանն ասաց, որ այս պահին Խոջոյանին տանում են Իջեւանի հիվանդանոց բժշկական զննության:
Մարտի 7-ին մոտ ժամը 12:30-ին Թովուզում տեղաբնակները գերեվարել են խիտ ամպամածության պատճառով մոլորվելով հայ-ադրբեջանական սահմանը հատած Տավուշի շրջանի Վերին Կարմիրաղբյուր գյուղի 23-ամյա հովիվ Արսեն Խոջոյանին: Գերեվարված հայ երիտասարդին բնակիչներն անմիջապես հանձնել են Ադրբեջանի ազգային անվտանգության նախարարության աշխատակիցներին: Արսեն Խոջոյանը ադրբեջանական գերությունից մարտի 4-ին վերադարձված եւ այնտեղ խոշտանգումների ենթարկված Հայաստանի 77-ամյա քաղաքացի Մամիկոն Խոջոյանի հեռու ազգականն է:
