«Դանդի Փրիշս Մեթալս Կապան» ՓԲԸ-ում մայիսի 27-ի առավոտյան դժբախտ պատահար է տեղի ունեցել: Դեպքի մասին ընկերությունը տարածել է պաշտոնական հաղորդագրություն, որում մասնավորապես նշված է՝ «Դանդի Փրիշս Մեթալս Կապան ընկերությունը ցավով տեղեկացնում է, որ մայիսի 27-ին' ժամը 10.00-ի սահմաններում, Շահումյանի անվան հանքի հարավային տեղամասում տեղի է ունեցել դժբախտ պատահար՝ աշխատակցի մահվան ելքով: Ցավակցում և զորակցություն ենք հայտնում մեր գործընկերոջ ընտանիքին և մերձավորներին»: Պատահարի զոհը ընկերության հորատող, 2 անչափահաս երեխաների հայր 37-ամյա Խաչատուր Առաքելյանն է: Դեպքը տեղի է ունեցել առավոտյան հերթափոխի ժամանակ՝ հսկա քարը պոկվել և ընկել է Առաքելյանի վրա, ում գործընկերները գտել են մահացած: Ընկերության տնօրինությունն անմիջապես դադարեցրել է ձեռնարկության աշխատանքները, ստեղծել հանձնաժողով, որը համապատասխան մարմինների միջոցով ճշտում է դեպքի մանրամասները: Սա ընկերությունում այս տարի արձանագրված մահացու ելքով առաջին դժբախտ պատահարն է: Դեպքի մասին ընկերությունը, ըստ պաշտոնական հաղորդագրության, մանրամասներ կտրամադրի հետագայում: