Երևանի քաղաքապետ Տարոն Մարգարյանի նախաձեռնությամբ դեռևս 2011 թվականի դեկտեմբերից Երևանի քաղաքապետարանը Հայ-Դանիական «Հանս Քրիստիան Կոֆոեդ» բարեգործական հիմնադրամի հետ նախաձեռնել և իրականացնում է մայրաքաղաքի անօթևաններին ժամանակավոր կացարաններում տեղավորելու ծրագիրը: Ինչպես «Արմենպրես»-ին տեղեկացրին Երևանի քաղաքապետարանի տեղեկատվության և հասարակայնության հետ կապերի վարչությունից, տարեսկզբիÖ մինչ օրս կիսակառույցներում, կանգառասրահներում, շենքերի մուտքերում, այգիներում, աղբարկղներին հարակից հատվածներում գիշերող մարդկանցից կացարան են տեղափոխվել 133 անօթևաններ, որոնցից կացարանում ներկայում փաստացի բնակվում են 100-ը, այդ թվում 86-ը Երևան քաղաքից:

2011 թվականի դեկտեմբերի 23-ից մինչ այսօր սոցիալ-հոգեբանական աշխատանքի արդյունքում հարազատների մոտ են տեղափոխվել 41 անօթևաններ, 66-ը տեղավորվել են աշխատանքի և վերադարձել ինքնուրույն կյանքի, 17-ը տեղափոխվել են մասնագիտացված տուն-ինտերնատներ, հոգեկան շեղումներ ունեցող, ինչպես նաև թմրանյութերից և խմիչքից կախվածություն ունեցող 11 անօթևաններ բուժման նպատակով տեղափոխվել են մասնագիտացված հաստատություններ, 10-ը ամուսնացել են և հեռանալով կացարանից, անցել ինքնուրույն կյանքի։ Ռուսաստանի դաշնության 4 քաղաքացի տեղափոխվել են հայրենիք, հետախուզման մե ջ գտնվող 2 անօթևան կալանավորվել է, ևս 18-ին անձնագրեր են տրվել:

Անօթևանններին ժամանակավոր կացարանում տեղավորման, սոցիալական տարաբնույթ աջակցությունների մատուցման աշխատանքները Երևանի քաղաքապետարանի սոցիալական առաջնահերթություններից են և գտնվում են Երևանի քաղաքապետ Տարոն Մարգարյանի մշտական ուշադրության ներքո:

Շարունակվող աշխատանքների արդյունքում Ստեփան Շահումյանի արձանի ետնամասում գտնվող այգու տարածքից 2014 թվականի օգոստոսի 13-ին ևս չորս անօթևաններ են տեղափոխվել Վարդաշենի «Հանս Քրիստիան Կոֆոեդ» հիմնադրամի շենքում տեղակայված անօթևանների կացարան, իսկ մեկը, որն ունեցել է առողջական լուրջ խնդիրներ, տեղափոխվել է «Սուրբ Գրիգոր Լուսավորիչ» ԲԿ, որտեղ համապատասխան բուժում ստանալուց հետո կտեղափոխվի ժամանակավոր կացարան։