Ըստ վերջին տվյալների՝ Չինաստանում մոլեգնող «Ռամասուն» թայֆունի զոհ Է դարձել 62 մարդ: Այդ մասին, ինչպես տեղեկացնում Է «Արմենպրես»-ը, հուլիսի 25-ին հաղորդել է «Սինխուա» գործակալությունը՝ վկայակոչելով ՉԺՀ-ի քաղաքացիական վարչակազմի նախարարությունը:
Ավելի վաղ հաղորդվել էր 46 զոհվածների մասին: Եվս 21 մարդ անհետ կորած է համարվում:
Գերատեսչության տվյալներով՝ վերջին 40 տարվա ընթացքում ամենաուժեղ թայֆունն արդեն վնաս է պատճառել Չինաստանի Գուանդունի, Հայնանի, Յունանի նահանգների եւ Գուանսի-Չժուանի ինքնավար շրջանի ավելի քան 11 մլն բնակիչների: Ըստ նախնական գնահատումների՝ տարերքի պատճառած վնասը կազմում Է 6,2 մլրդ դոլար:
Ավելի քան 820 հազար բնակիչներ տեղատարափ անձրեւների ու հեղեղումների պատճառով հարկադրված են եղել լքել իրենց տները, 261 հազար մարդ առաջին անհրաժեշտության իրերի կարիք ունի:
Հորդառատ անձրեւները մինչ այժմ ոչնչացրել են 37 հազար տուն: Թայֆունից տուժած շրջաններում մասնակիորեն վնասված են ենթակառուցվածքի օբյեկտներն ու ճանապարհները, նկատվում են Էլեկտրականության եւ ջրի մատակարարման ընդհատումներ:
Ավելի վաղ հաղորդվել Է, որ «Ռամասուն» թայֆունը մոլեգնել Է Ֆիլիպիններում եւ Վիետնամում, որտեղ ընդհանուր առմամբ տարերքի զոհ Է դարձել ավելի քան 60 մարդ, հաղորդել Է ՌԻԱ Նովոստին:
