Էբոլա տենդի բռնկման սպառնալիքը թերագնահատված է եղել: Այդ մասին, ինչպես տեղեկացնում է «Արմենպրես»-ը, հղում անելով Agence France-Presse-ին, հաղորդել է Առողջապահության համաշխարհային կազմակերպության գլխավոր տնօրեն Մարգարեթ Չենը:
Քառասուն տարի առաջ հիվանդության բռնկում էր դիտվում Աֆրիկայի հեռավոր շրջաններում, բայց այժմ մարդիկ սկսել են ավելի շատ ուղեւորություններ կատարել, ինչը հանգեցրել է նոր, էլ ավելի ընդգրկուն համաճարակի, ասել է Չենը մամուլի ասուլոիսում: Ինչպես պարզաբանել է ԱՀԿ-ի ղեկավարը, խնդիրը կարանտինի տեւողությունն է, որն Էբոլայի տենդի դեպքում կազմում է 21 օր, այլ ոչ թե երեք օր, ինչպես հիվանդությունների մեծ մասի դեպքում: Մարդկանց դժվար է մեկուսացման մեջ պահել այդքան երկար ժամանակ, նշել է նա:
Իր հերթին ՄԱԿ-ի՝ Էբոլա տենդի գծով հատուկ համակարգող Դեւիդ Նաբարոն խոստովանել է, որ վիրուսի տարածումը առաջ է անցել բժիշկների գործողություններից:
«Բժիշկներ առանց սահմանների» կազմակերպության ղեկավար Ջոան Լյուն, ելույթ ունենալով ՄԱԿ-ում, հայտարարել է, որ տենդի տարածումը կհաջողվի կանգնեցնել միայն այն դեպքում, եթե զարգացած երկրներն ավելի շատ մասնագետներ ուղարկեն Արեւմտյան Աֆրիկա, նշում է Reuters-ը: Տարածաշրջանի երկրների բարեգործական կազմակերպություններն ու իշխանություններն ի վիճակի չեն ինքնուրույն կանգնեցնել հիվանդության տարածումը, ընդգծել է նա:
Էբոլա տենդի բռնկումն սկսվել է այս տարվա փետրվարին Գվինեայում, ավելի ուշ վիրուսը տարածվել է հարեւան Աիեռա Լեոնեում, Լիբերիայում եւ Նիգերիայում: Օգոստոսի 25-ին հայտնի է դարձել, որ վտանգավոր հիվանդությունը հասել է Կոնգոյի Դեմոկրատական Հանրապետություն եւ Սենեգալ:
Առողջապահության համաշխարհային կազմակերպության վերջին տվյալների համաձայն՝ վիրուսն արդեն 1552 մարդու կյանք է խլել, ընդ որում նրանցից շուրջ 700-ը՝ Լիբերիայում, իսկ ընդամենը գրանցված է հիվանդության ավելի քան 3 հազար դեպք:
