Քրդական ուժերը սկսել են ակտիվորեն հարձակումներ գործել թուրք-սիրիական սահմանի մերձակայքում Քոբանի քաղաքի արևելյան շրջանների վրա:
Ինչպես հաղորդում է «Արմենպրես»-ը՝ վկայակոչելով արաբական լրատվամիջոցները, ցամաքում տեղի ունեցող շարժումներին զուգահեռ, միջազգային դաշինքի օդանավերը 2 հարված են հասցրել Քոբանիի արևելքում «Իսլամական պետության» դիրքերին: Պաշտպանական ուժերը հաստատել են, որ սպանվել են 15 ահաբեկիչ:
Ավելի վաղ լրատվմիջոցները տեղեկացրել էին, որ քրդական ուժերը ազատագրել են քաղաքի մեծ մասը: Քաղաքի միայն 20 տոկոսն է մնում ԻՊ-ի վերահսկողության տակ:
Ավելի քան 2 ամիս շարունակվող բախումների ընթացքում ահաբեկիչների զոհերի և վիրավորների թիվը գերազանցում է 3 հազարը: Շուրջ 200հազար քրդեր ստիպված փախուստի են դիմել քաղաքից և շրջակա գյուղերից: Քաղաքը կարևոր նշանակություն ունի ԻՊ-ի համար, քանի որ այն գրավելու դեպքում կազմակերպությունը վերահսկողություն կհաստատի Թուրքիայի սահմանի մերձակայքում Հալեպի մարզի գրաված տարածքներից մինչև Ռակկայի մերձակայքում գտնվող Թել Աբյադ քաղաք:
Քոբանի կամ Այն ալ Արաբ քաղաքը գտնվում է Դամասկոսից 532 կմ հեռավորության վրա՝ Թուրքիայի սահմանի մերձակայքում:
