Սերժ Սարգսյանը իր նախընտրական քարոզարշավի հոլովակներում օգտագործել է դրվագներ, որտեղ հանդես է գալիս որպես քաղաքացիական նախաձեռնությունների թիկունքում կանգնած պաշտոնյա։ Մաշտոցի պուրակում ուղիղ մեկ տարի առաջ սկսված և երեք ամիս տևած քաղաքացիական պայքարում ՀՀ ինքնորոշված քաղաքացիները պայքարել են հենց Սերժ Սարգսյանի վարչակարգի սնած օլիգարխների բիզնես շահերի և դրանց հետևանքով արտոնված ապօրինությունների դեմ։ Բայց և այնպես ստացվում է, որ իբր թե իշխող կուսակցությունը, քաղաքացու հետ ուս ուսի տված, պայքարել է ինքն իր դեմ, իր գործարար շահերի և իր իսկ ապօրինությունների դեմ։ Սա կատարյալ աբսուրդ է և իրականության խեղաթյուրում՝ հատուկ քարոզչական նպատակներով։
Շահագործելով քաղաքացիական նախաձեռնությունների ակտիվությունը՝ ՀՀԿ առաջնորդի քարոզչությամբ զբաղվող թիմը փորձում է ներկայացնել այն որպես Սերժ Սարգսյանի արժանիք, ինչը առնվազն ծիծաղելի է, իսկ իրականում զարհուրելի մի կեղծիք։ Սրանով անուղղակիորեն արդարացվում են նաև քաղաքաշինական, բնապահպանական օրինախախտումները և մարդու իրավունքների ոտնահարումների պարբերական թողտվությունը հենց իշխող ռեժիմի կողմից, որպեսզի քաղաքացին, այլընտրանք չունենալով, ակտիվություն դրսևորի, ինչից հետո էլ իշխանական քարոզչամեքենայի միջոցով ներկայացնել թե «քաղաքացիական հասարակությունը երբեք այսքան ակտիվ չէր եղել»։
Նման կլոունադայով զբաղվող PR թիմը վերոհիշյալ թեկնածուի համար ստեղծել է հիպեր-իրականության մի պատկեր, որը, չնայած տրամագծորեն հակադիր է իրական պատկերին, սակայն հաշվարկված ձևով հրամցվում է ողջ հանրությանը։ Նկատվում են նաև բիբլիական և այլ մոտիվների միջոցով քաղաքական կերպարի ֆետիշացման երևույթներ։
Մենք ամոթալի և զազրելի ենք համարում քաղաքական քարոզչության բոլոր այն դրսևորումները, որոնց միջոցով շահագործվում է ազատ քաղաքացու կերպարը, նրա պայքարն ու հաղթանակները։ Դատապարտում ենք տեղեկատվական այնպիսի մեթոդիների կիրառումը, որոնցով քաղաքական այս կամ այն գործիչը դիտավորյալ կերպով սխալ է մեկնաբանում և սեփական քարոզչական նպատակներով օգտագործում իր հետ առնչություն չունեցող, ավելին՝ հենց իր վարչական-քաղաքական գործելակերպի դեմ ուղղված քաղաքացիական գործողությունները և շարքային քաղաքացիների համատեղ ջանքերով ձեռքբերված արդյունքները։
«Մեր քաղաքը» հանրային-քաղաքացիական նախաձեռնություն