ՀՀ քննչական կոմիտեի Արմավիրի մարզային քննչական վարչությունում շարունակվում է Արմավիր մարզի Ալաշկերտ համայնքի մանկապարտեզի սաների թունավորման դեպքի առթիվ հարուցված քրեական գործի նախաքննությունը, որի շրջանակներում միջոցներ են ձեռնարկվում՝ պարզելու երեխաների թունավորման պատճառները, եղանակը։
2015թ. մայիսի 8-ից 10-ն ընկած ժամանակահատվածում Արմավիրի մարզի Ալաշկերտ համայնքից Արմավիրի ԲԿ-ի ինֆեկցիոն բաժանմունք է հոսպիտալացվել 6, այնուհետև' 5 երեխա, և բոլորի մոտ եղել են նույն ախտանշանները' լուծ, փսխում, ջերմություն, ընդհանուր թուլություն։
Երեխաների նկատմամբ նշանակվել են դատաբժշկական փորձաքննություններ: Ստացված եզրակացությունների համաձայն՝ մանկապարտեզի սաների մոտ ախտորոշվել է «Սուր աղիքային ինֆեկցիա անհայտ ծագման, գաստրոէնտերոկոլիտիկ տարբերակ, միջին ծանրության ձև», որն առողջությանը պատճառել է թեթև վնաս:
Նախաքննության ընթացքում մանկապարտեզում առկա բոլոր տեսակի սննդամթերքներից և ջրից վերցվել են նմուշներ, նշանակվել է դատասննդային փորձաքննություն, որի եզրակացությունը դեռևս չի ստացվել:
12.06.2015թ. ՀՀ ԱՆ «Հիվանդությունների վերահսկման և կանխարգելման ազգային կենտրոն» ՊՈԱԿ-ից ստացվել է 11.05.2015 թվականից մինչև 15.05.2015 թվականն ընկած ժամանակահատվածում մանկապարտեզում իրականացված լաբորատոր հետազոտությունների արդյունքները:
Համաձայն մանրէակրության, վարակակրության վերաբերյալ վարակի հետ շփված անձանց շրջանում անցկացված հետազոտության արձանագրությունների' երեխաներից մի քանիսի մոտ հայտնաբերվել է «Կլեբսիելա», իսկ մյուսների մոտ «Շիգելլա զոնե»:
Խոհանոցում կատարված հետազոտության արձանագրության համաձայն՝ աղիքային ցուպիկի խմբի մանրէներ (ԱՑԽՄ) են հայտնաբերվել սառնարանի միջից, պանրի և կարագի ամաններից, մաքուր ափսեներից, բաժակներից, գդալներից և դանակներից, կտրատած տավարի մսից, փլավի կաթսայից, խոհարարի ձեռքերից, հագուստից և խալաթից:
Քննություն է տարվում՝ պարզելու վարակի առաջացման աղբյուրը, տարածման եղանակը, նախադպրոցական ուսումնական հաստատություններում երեխաների սննդի կազմակերպմանը ներկայացվող հիգիենիկ պահանջների, սանիտարական կանոնների և նորմերի պահպանման համար պատասխանատու անձանց շրջանակը։
Նախաքննության արդյունքների մասին տեղեկություն կտրամադրվի լրացուցիչ։
