Ընտանիքով Ռուսաստանից Լեռնային Ղարաբաղի Շուշի քաղաք տեղափոխված ռուսաստանցի մեծահարուստ, գործարար Գերման Ստերլիգովը հայտարարել է, որ իր նկատմամբ միջազգային որոնում հայտարարելով՝ Ադրբեջանն իրավապես ճանաչել է ԼՂՀ-ի անկախությունը:

 

 

Ինչպես հաղորդում է «Արմենպրես»-ը, «ՎԿոնտեակտե» սոցիալական ցանցի իր էջում Ստերլիգովը իրավական գիտելիքներ է հայտնել իր նկատմամբ միջազգային որոնում հայտարարած Ադրբեջանին' բացատրելով, Ադրբեջանի օրեսնդրությամբ՝ այդ երկրում հանցագործություն կատարած անձի նկատմամբ միջազգային որոնում կարող է հայտարարվել միայն այն դեպքում, եթե նա գտնվում է երկրից դուրս:

 

 

Ստերլիգովի խոսքով' Ադրբեջանը, որը երկու տասնյակից ավելի տարիներ ԼՂՀ-ն չի ճանաչել անկախ պետություն, որին դժվար է բացահայտ հայտարարել, որ Արցախն Ադրբեջանի տարածք չէ, այժմ փաստացի անկախ ԼՂՀ-ի նկատմամբ նկրտումներից հրապարակորեն հրաժարվելու ավելի քաղաքավարի, բայց իրավաբանորեն անբասիր ձեւ է գտել:

 

 

«Ադրբեջանի օրենսդրությունն իր տարածքում հանցագործություն կատարած անձի նկատմամբ Ինտերպոլի միջոցով միջազգային որոնում նախատեսում է միայն այն դեպքում, երբ «հանցագործը» գտնվում է «Ադրբեջանի տարածքից դուրս»: Այսպիսով, Ադրբեջանը հրապարակորեն միջազգային մակարդակով ճանաչել է, որ Լեռնային Ղարաբաղը Ադրբեջանի տարածք չի հանդիսանում»,- գրել է Ստերլիգովը:

 

 

Ստերլիգովը միաժամանակ ողջույններ է փոխանցել Ադրբեջանի ղեկավարությանը' խորը գոհունակություն հայտնելով այն բանի համար, որ իր «համեստ անձը իրավաբանական առիթ է դարձել Լեռնային Ղարաբաղի անկախությունը ճանաչելու, ինչպես նաեւ հայ եւ ադրբեջանական ժողովուրդների միջեւ բարիդրացիական հարաբերություններ ստեղծելու համար»:

 

 

Հուլիսի 22-ին հայտնի է դարձել, որ նրա' «Ղարաբաղը վաղնջական հայկական հող է» խոսքից հետո Ադրբեջանում Ստերլիգովի դեմ երկու հոդվածներով քրեական գործ է հարուցվել:

 

 

«ՎԿոնտակտե» սոցցանցի իր պաշտոնական էջում մեկնաբանելով Ադրբեջանում իր դեմ քրեական գործ հարուցվելու մասին լուրը, Ստերլիգովը նշել էր, որ այդպես է ադրբեջանական կողմն արձագանքել ռուսաստանցի, հայ եւ ադրբեջանցի փորձագետների մասնակցությամբ խաղաղ կլոր սեղան անցկացնելու մասին իր առաջարկին:

 

 

«Նշանակում է' վախենում են պատմականորեն Ղարաբաղի պատկանելության մասին թեմայի փաստերով բաց քննարկումից: Հայերը չեն վախենում բաց քննարկումից, ռուսները չեն վախենում: Իսկ ադրբեջանցիների մոտ հիսթերիա եւ սպառանալիքներ են: Ի՞նչ կարող է դա նշանակել»,- նշել էր նա:

 

 

Հունիսի սկզբից կնոջ եւ 5 երեխաների հետ Շուշիում բնակություն հաստատած Ստերլիգովը դիմել էր ադրբեջանցիներին, «որպեսզի եւս մեկ անգամ հրապարակորեն հաստատվի անվիճելի եւ բացարձակ պատմական ճշմարտությունը. Ղարաբաղը վաղնջական հայկական հող է»:

 

 

«Առանց բացառության, բոլոր հնամյա տարեգրությունները, պահպանված քարտեզները, հին գերեզմանոցները եւ գերեզմանները խոսում են այն մասին, որ Ղարաբաղը հնամենի հայկական հողերի մաս է»,- հայտարարել էր Ստերլիգովը: