Չնայած Հայաստանի սահմաններում ախոյանի նախահարձակ գործողությունները զսպելու և հակադարձելու օրախնդիր հարցերին' երկիրը պատրաստակամորեն և հետևողականորեն զարգացնում է խաղաղապահ կարողությունները, այս ոլորտում բազմազգ գործողություններին մասնակցության ծավալներն ու աշխարհագրությունը' հանուն տարածաշրջանային ու միջազգային խաղաղության ու կայունության: «Արմենպրես»-ի փոխանցմամբ' նման հայտարարություն արեց ՀՀ պաշտպանության նախարար Սեյրան Օհանյանը «Խաղաղապահական գործողությունների մարտահրավերների միջազգային ֆորումի» ամենամյա համաժողովի բացման ժամանակ: «Մենք համապարփակ ձևով ներկայացրեցինք խաղաղությանը վերաբերող բոլոր այն գործողությունները, որոնք անհրաժեշտ են մարտահրավերների, հակամարտությունների սկզբնական փուլից մինչև խաղաղության լիարժեք ամրապնդում: Հայաստանի խաղաղապահ ուժերի բրիգադն օրինակելի է և կարող է նաև ՀԱՊԿ շրջանակներում ուսումնական նյութական բազայի համապատասխան հենք հանդիսանալ: Լսելով չէ, որ գիտենք խաղաղության արժեքը, և թե ինչ գին պետք է վճարել դրա համար»,- նշեց Սեյրան Օհանյանը:

2004թ. փետրվարից հայ խաղաղապահները միացել են ՆԱՏՕ-ի խաղարարար առաքելությանը և հունական, հետագայում' ամերիկյան զինուժերի կազմում առաքելություն իրականացրել Կոսովոյում, 2005 թվականի հունվարից մինչև 2008-ի հոկտեմբերը լեհական բազմազգ դիվիզիայի կազմում' Իրաքում, իսկ 2010 թվականի հունվար-փետրվարից' Աֆղանստանում' Գերմանիայի Դաշնության զինված ուժերի կազմում: Հայ խաղաղապահների 32 հոգանոց դասակը 2014թ. նոյեմբերի 26-ից ՅՈՒՆԻՖԻԼ առաքելության կազմում՝ իտալական հրամանատարության ներքո, խաղաղապահ առաքելություն է իրականացնում Լիբանանում: ՀՀ ԶՈՒ-ն համաձայնություն է ձեռք բերել, որ Հայաստանը կմասնակցի նաև Մալիում կազմակերպվելիք խաղաղարար առաքելությանը: