Երևանում բացվեց Տարածաշրջանային ժողովրդավարության դպրոցը, որի ընթացքում հիմնադիրները մասնակիցներին ներկայացրեցին դպրոցի առաքելությունը, նպատակները, ծրագիրը և բանախոսներին:
Դպրոցի համահիմնադիր, Քաղաքական գիտությունների թեկնածու, դոցենտ Հայկ Սուքիասյանը ԼՈւՐԵՐ.com-ի հետ զրույցում նշեց, որ ՏԺԴ-ի ստեղծման նպատակն է խորացնել քաղաքագիտական կրթությունը և այն ավելի հասանելի դարձնել լայն հասարակայնության համար: «Այս դպրոցն ունի հստակ քաղաքագիտական ուղղվածություն: Պետությունները, որոնք ցանկանում են ապրել, ստեղծել կազմակերպված պետականություն և հասարակություն, այլ ոչ թե «յոլա գնալ», հստակ գիտակցում են՝ քաղաքականապես կրթված հասարակությունը բարիք է, իսկ քաղաքականապես չկրթված հասարակությունը՝ խնդիր իրենց և աշխարհի համար»,-նշեց Հայկ Սուքիասյանը՝ շեշտելով, որ դպրոցի ծրագրային ուղղվածությունը խիստ արդիական է և այն դասավանդելու են ոլորտի՝ բացառապես պրոֆեսիոնալ մասնագետները:
Ըստ մեր զրուցակցի՝ նմանատիպ դպրոցների գործունեությունը տարածված պրակտիկա է ամբողջ աշխարհում, և դրանց նպատակն է քաղաքագիտական գիտելիքը հասարակությանը հասցնել ավելի մատչելի եղանակներով. «Մյուս կողմից՝ նմանատիպ դպրոցների ծրագրերն, ի տարբերություն համալսարանական ծրագրերի, իրավիճակներին շատ արագ են արձագանքում, հետևաբար` դասավանդման գործընթացում ներառվում են իրադարձային լուրջ ուսումնասիրություններ՝ դասավանդման գործընթացը դարձնելով արդիական»:
Տարածաշրջանային ժողովրդավարության դպրոցի համահիմնադիր, Քաղաքական գիտությունների թեկնածու, դոցենտ Էմիլ Օրդուխանյանը նշեց, որ այս դպրոցը վերաորակավորման նոր պայման է ստեղծում ոչ միայն նրանց համար, ովքեր քաղաքագիտության նկատմամբ ունեն հետաքրքրություններ, այլ նաև պրոֆեսիոնալ քաղաքագետների և նրանց համար, ովքեր ներգրավված են քաղաքական գործընթացների մեջ՝ տալով նրանց հնարավորություն քայլել ժամանակին համընթաց:
«Մենք ունենք շատ ակտիվ երիտասարդներ, ովքեր փորձում են իրենց ներուժն ու գիտելիքները կիրառել քաղաքականության մեջ՝ համագործակցելով տարբեր քաղաքական կուսակցությունների հետ: ՏԺ դպրոցը հավելյալ օժանդակություն կլինի նրանց համար՝ տալով նրանց նոր որակներ և հնարավորություններ՝ քաղաքական այս կամ այն երևույթների վրա իրենց ազդեցությունն ունենալու համար»,-մեզ հետ զրույցում նշեց Էմիլ Օրդուխանյանը:
Նշենք, որ Տարածաշրջանային ժողովրդավարության դպրոցում դասընթացը կտևի երկու ամիս, շրջանավարտներին կտրվի դիպլոմ՝ հաստատված Ժողովրդավարության և երկրաքաղաքական հետազոտությունների խորհրդի կողմից:
Դպրոցի ընդունելության հայտարարությունը կտեղարվի դպրոցի կայք էջում՝ այսօր 26.03.2017-ին:
Աղավնի Սուքիասյան