Ադրբեջանի քրեական օրենսգրքի 234.4.3 հոդվածով (խոշոր չափով թմրանյութի ձեռքբերում, արտադրություն, իրացում և տեղափոխում) 8 տարվա ազատազրկման դատապարտված Ռուսաստանի հայազգի քաղաքացի Մարատ Ուելդանով-Գալուստյանի հարազատները սպասում են վերաքննիչ դատական նիստի ժամկետներին: Այս մասին տեղեկացրեց Մարատի քույրը՝ Մարիանա Միրզոյանը:
«Ես վստահ եմ, որ վճիռը կմնա նույնը, սակայն կանենք հնարավոր ամեն ինչ, որ Մարատը տեղափոխվի Ռուսաստան եւ պատիժն այնտեղ կրի: Նրան Ադրբեջանում թողնելը հավասարազոր է սպանության: Եղբայրս հարազատների կարիքը շատ ունի, բայց հասկանալի պատճառներով չենք կարող նրան այցելել»,-ասաց Մարիանան՝ տեղեկացնելով, որ եղբոր հետ վերջին անգամ խոսել է երեկ՝ հունիսի 6-ին:
Հեռախոսազրույցի ժամանակ Մարատը կրկին հուզված է եղել եւ ասել է, որ կարիք ունի մեծ հոգեբանական աջակցության:
«Ես չգիտեմ՝ ինչ է լինելու հետագայում. ինձ մոտ այն տպավորությունն է, որ սա արդեն վերջն է: Երբ գալիս էի հեռախոսի մոտ, մտածում էի հարազատներիս հրաժեշտ տալու եւ ինձ վրա այդքան ժամանակ ծախսելու համար շնորհակալություն հայտնելու մասին: Շնորհակալ եմ այն ամենի համար, ինչ անում եք, բայց մտածում եմ, որ այս ամենը ապարդյուն է, քանի որ ինչի, որ նրանք ուզում են հասնել, կհասնեն: Ես արդեն ուժ չունեմ, անզոր եմ: Ինչ էլ ինձ հետ կատարվի, իսկ ես կասկած չունեմ, որ ինչ-որ բան կկատարվի, ինձ հիշեք այնպիսին, ինչպիսին եղել եմ: Ես չեմ հասկանում՝ ինչու են ինձ մեկուսարանում պահում, ինչ նպատակներով, ինչու չեն այցելում: Ես պարզապես ուզում եմ խոսել Ռուսաստանի ներկայացուցչի հետ: Ամեն անգամ, երբ դուռը բացվում է, չգիտեմ՝ ինչի սպասել, չգիտեմ՝ ինձ ուր կտանեն»,-ասել է Մարատ Ուելդանով-Գալուստյանը՝ քրոջ հետ զրույցում նաեւ նշելով, որ սա մի մեծ խաղ է, որտեղ ամեն ինչ հատուկ ծրագրված է, այդ թվում՝ նաեւ նրա դատի երկարաձգումը հատկապես կարեւոր գործերով քննիչի կողմից:
Զրույցից հետո քույրը զանգահարել է Ադրբեջանում Ռուսաստանի դեսպանատուն հյուպատոսական բաժնի ղեկավարի հետ զրուցելու եւ իմանալու, թե երբ վերջապես կայցելեն Մարատին: Նրան հայտնել են, որ բաժնի ղեկավարը արձակուրդում է:
Մարատ Ուելդանով-Գալուստյանին ձերբակալել էին 2016թ. հունիսի 9-ին Ադրբեջանի քրեական օրենսգրքի բավականին տարածված 234.4.3 հոդվածով, որը նախատեսում է պատիժ մեծ քանակությամբ թմրանյութերի անօրինական պատրաստման, արտադրության, ձեռքբերման, պահպանման, տեղափոխման համար: Ավելի վաղ Մարիանա Միրզոյանը մեզ հետ զրույցում նշել էր, որ եղբայրը երբեւէ առնչություն չի ունեցել թմրանյութերի հետ: Ուելդանով-Գալուստյանը ավստրիական «Do&Co» ընկերության աշխատակից է, որը զբաղվում է արտագնա սննդի կազմակերպմամբ եւ Բաքու էր մեկնել գործուղման:
Ադրբեջանում Ռուսաստանի դեսպանատան՝ Մարիանա Միրզոյանին ուղղված հենց առաջին պատասխան նամակում, մասնավորապես, ասված էր.
«Հայաստանի եւ Ադրբեջանի զինված հակամարտության պայմաններում Ձեր եղբոր հայկական ծագումը անչափ բարդացնում է նրա պաշտպանությունը»: Այս արտահայտությունը տեղիք է տվել կարծելու, որ Ուելդանով-Գալուստյանին բանտում պահում են հայկական ծագման պատճառով:
ՌԴ արտգործնախարարությունը մի քանի անգամ անդրադարձել է Ուելդանով-Գալուստյանի գործին՝ նշելով, որ միջազգային իրավունքի եւ երկկողմ համաձայնությունների շրջանակում Ռուսաստանի քաղաքացու՝ օրենքով սահմանված իրավունքների պաշտպանությանն ուղղված միջոցներ են ձեռնարկվում՝ անկախ նրա ազգային պատկանելիությունից, իսկ ավելի վաղ ՌԴ արտգործնախարարի մամուլի խոսնակ Մարիա Զախարովան նշել էր, որ ռուսական կողմը Ուելդանովի ձերբակալումը կամ նրան օժանդակություն ցուցաբերելու հարցը չի դիտարկում ազգային խնդիրների համատեքստում:
Մարատ Ուելդանով-Գալուստյանը չի ընդունում իր մեղքը: Հարազատները, ովքեր բազմիցս դիմել են թե Ռուսաստանի, թե Ադրբեջանի պետական մարմիններին, տեղեկացրել Մարատի վիճակի, նրա հանդեպ իրականացնող բռնությունների մասին, համոզված են, որ Մարատին Բաքվում պահում են բացառապես ազգային պատկանելիության պատճառով:
