Ազգային ժողովի փոխնախագահ Էդուարդ Շարմազանովը վստահեցնում է, որ ՀՀ վարչապետ Կարեն Կարապետյանը իշխող Հանրապետական կուսակցության քաղաքական թիմի առանցքային ներկայացուցիչն է և անհեթեթ է որակում գնահատականները, թե ՀՀԿ ներկայացուցիչները հոկտեմբերի 30-ին մեկնարկած 2018թ. պետական բյուջեի նախագծի քննարկումներին բոյկոտել են վարչապետին: «Արմենպրես»-ի հետ զրույցում, անդրադառնալով հնչող գնահատականներին, թե բյուջեի նախագծի քննարկումների ժամանակ իշխող ՀՀԿ-ն բոյկոտել է վարչապետին, քանի որ քննարկումներին չեն մասնակցել ԱԺ նախագահ Արա Բաբլոյանը, Վահրամ Բաղդասարյանը, Արմեն Աշոտյանը, ԱԺ փոխնախագահն ընդգծեց, որ բոլոր այդ անձինք, ում անունները նշվել է, գործուղման մեջ են, Կորյուն Նահապետյանը դահլիճում է եղել, իսկ Խոսրով Հարությունյանը ընդամենը 5 րոպե ուշացել է քննարկումներից: ԱԺ փոխնախագահը նաև շեշտեց, որ հոկտեմբերի 31-ի քննարկումներին էլ մեծամասամբ ՀՀԿ խմբակցության պատգամավորներն են մասնակցում.

«Այս պահին 11-12 պատգամավոր են մասնակցում, որից 8-ը'ՀՀԿ-ական. սա՞ է բոյկոտումը: Կարեն Կարապետյանը մեր քաղաքական թիմի առանցքային ներկայացուցիչն է, նախագահի, մեր թիմի կողմից նշանակված վարչապետն է, մենք մի թիմ ենք ներկայացնում: Բոլոր փորձերը'ստվեր գցել եւ փորձել ինչ-որ բաներ տեսնել կառավարության և Ազգային ժողովի մեծամասնության միջև, անթույլատրելի են»,-ասաց ԱԺ փոխնախագահը:

Նա հավելեց, որ ԱԺ նախագահը գործուղման մեջ է, ինքը՝որպես ԱԺ փոխնախագահ, տեղում է, խմբակցության ղեկավարը գործուղման մեջ է, խմբակցության քարտուղարը տեղում է, հանձնաժողովների նախագահները նույնպես տեղում են: Սա մեր բյուջեն է, մեր կառավարության և մեր վարչապետի բյուջեն է, Հանրապետականն էլ սատարում է այս բյուջեն»,- եզրափակեց Շարմազանովը: