«Եթե մեր պատկերացրած ձևաչափը չկայանա, Երևանի ավագանու ընտրություններին կգնանք առանձին ցուցակով»,- Lragir.am-ին ասաց ՀՅԴ գերագույն մարմնի անդամ Արսեն Համբարձումյանը:
Նա նշեց, որ ՀՅԴ-ն այն տեսակետին է, որ միասնական մասնակցելու դեպքում ճիշտ կլինի եռաչափ ձևաչափը կիրառել: Արսեն Համբարձումյանը նկատի ունի ՀՅԴ-ի, Ժառանգության և ԲՀԿ-ի միասնական մասնակցությունը, քանի որ, նրա խոսքով, այս երեք ուժերի միջև են խնդրի վերաբերյալ քննարկումներ եղել: Եթե այդ ձևաչափը չկայանա, ըստ Արսեն Համբարձումյանի, ՀՅԴ-ն միայնակ կմասնակցի ավագանու ընտրություններին:
ԲՀԿ այն հայտարարությանը, թե մյուս ուժերը պետք է համախմբվեն ԲՀԿ առանցքի շուրջը, Արսեն Համբարձումյանը պատասխանեց, որ իրենք որևէ մեկի առանցքի շուրջ համախմբվելու խնդիր չունեն:
Հարցին, թե ՀԱԿ-ի հետ միասնական գնալու սցենարը բացառո՞ւմ են' հաշվի առնելով, որ ՀԱԿ-ն էլ է կողմնակից միավորմանը, Արսեն Համբարձումյանը պատասխանեց, որ ՀԱԿ-ի հետ քննարկում չեն ունեցել:
«Ես կարծում եմ, որ ՀԱԿ-ի այդ կոչը պատշաճ չի արվել: Ոչ թե կոչ է արվում, այլ պաշտոնապես իրենց տեսակնետները փոխանցում են և պատրաստակամություն են հայտնում քննարկելու»,- ասաց նա:
Ըստ Արսեն Համբարձումյանի' ՀՅԴ-ն փորձել է զերծ լինել ամբիցիաներից, կառուցողական լինել, որպեսզի միասնական ճակատը կայանա: «Բայց դժբախտաբար պետք է արձանագրեմ, որ այդ նույն կոնստրուկտիվ մոտեցումը մյուս ուժերի կողից չենք նկատել այն առումով, որ այդ հնարավորությունն իրականություն դառնա»,- ասաց Արսեն Համբարձումյանը:
