Զբաղվելու եմ մասնագիտական գործունեությամբ, իմ գործընկերների՝ Դավիթ Հարությունյանի և այլոց հետ կա հիմնադրված իրավաբանական ընկերություն, որտեղ ծավալելու ենք մասնագիտական գործունեություն։ Այս մասին այսօր՝ հունվարի 11-ին, Ազգային ժողովում հայտարարեց նախկին պատգամավոր Արփինե Հովհաննիսյանը։

«Ուզում եմ ասել, որ ես տարիներ առաջ փաստաբանական գործունեությամբ զբաղվելու քննություն եմ հանձնել և լիցնեզիաս չեմ վերցրել, այդ գործունեությամբ հավանաբար ևս կզբաղվեմ, գումարած դրան՝ հանրային քաղաքականության մեջ մնալու ձևաչափի համար որոշ նախագծեր կան, բայց հիմա շատ փակագծեր չեմ բացի, կարող եմ ձեզ խոստանալ, որ հանրային քաղաքականությունից և ձեր հետ շփումներից չեմ խուսափելու»,–ասաց նա։

Հարցին՝ թե չի արտագաղթելու, Արփինե Հովհաննիսյանն ասաց, որ ոչ չի արտագաղթելու, Հայաստանի Հանրապետությունն իր հայրենիքն է և ինքը շարունակելու է այստեղ գործունեություն ծավալել:

Դիտարկմանը, թե  առաջարկներ ստանալու դեպքում կհամաձայնի պետականաշինության ոլորտում գործել, նա շեշտեց՝ «եթե»–ներով հարցերի չի սիրում պատասխանել։