ՀՀ կառավարությունը մինչև մարտի 20-ը պարտավորվում է ակտիվիստ Վարդգես Գասպարիին որպես փոխհատուցում վճարել 4000 եվրոյին համարժեք դրամ, քանի որ Հայաստանը Մարդու իրավունքների եվրոպական դատարանում պարտվել է «Գասպարին ընդդեմ Հայաստանի» գործով: ԼՈւՐԵՐ.com-ի հետ զրույցում Վարդգես Գասպարին ասաց, որ այդ մասին տեղեկացել է լրատվամիջոցներից, իսկ գումարը վերցնելիս հայտարարություն կանի, թե ինչ է անելու: 

«Գումարը իմ այսքան տարիների ընթացքում կրած տանջանքներին համարժեք բնավ չի կարող լինել: Առհասարակ մարդկային կյանքը չի կարող համարժեք լինել փողին: Այն իմ գրեթե մի քանի ամսվա աշխատավարձն է»,-նշեց նա:

Նշենք, որ 2008 թ. մարտի 1-ին Գասպարին ձերբակալվել էր ոստիկանի նկատմամբ բռնություն գործադրելու կասկածանքով, ինչը հաջորդել էր փետրվարի 19-ին Հայաստանում տեղի ունեցած նախագահական ընտրությունների արդյունքներին: Ստացվում է՝ նախկին իշխանության փոխարեն Գասպարիին փոխհատուցելու է նոր իշխանությունը: «ՄԻԵԴ վճիռը ոչ թե ընդդեմ իշխանության է, այլ՝ երկրի, այսինքն՝ ընդդեմ բոլոր քաղաքացիների, որոնք հանդուրժում են անարդարությունը: Այնպես, որ դա իշխանությամբ պայմանավորված չէ»,- նկատեց Գասպարին:

Հնարավո՞ր է ՄԻԵԴ-ի դիրքորոշումը պայմանավորված է եղել իշխանափոխության հանգամանքով հարցին ի պատասխան՝ Գասպարին նշեց. «Անկեղծ ասած՝ այո: Նախկին իշխանությունը ամեն տեսակ մանիպուլյացիաներ էր անում, ես  չեմ կարող ասել, թե ինչ, բայց քանի որ շատ երկար ժամանակ վճիռներ չէին կայացվում, ես ունեմ խիստ կասկած, որ նախկին իշխանությունը դրանում դերակատարություն է ունեցել: Նախկին իշխանությունը ստվերային մանիպուլյացիաների է դիմել, ամենայն հավանականությամբ, նոր իշխանությունը որևէ դրդապատճառ չունի նման գործողությունների դիմելու որևէ հարցում»,- ասաց նա:

Սոնա Հարությունյան