Երևանի կենդանաբանական այգու նախկին աշխատակիցներն այսօր՝ ապրիլի 12-ին, այգու դիմաց բողոքի ակցիա են անցկացնում. նրանց պահանջը չի փոխվել՝ շարունակում են պնդել, որ Երևանի կենդանաբանական այգու տնօրեն Ռուբեն Խաչատրյանի պաշտոնանկությունը պարտադիր է։
Բողոքի ակցիայի համար այս անգամ պատճառ է հանդիսացել սպիտակ վագրի հիվանդության սխալ ախտորոշումը։
«Այդ ախտորոշումը ակնհայտ անգրագիտության հետևանք է: Շատ մութ բաներ կար այդ ախտորոշման մեջ։ Մոսկվայի կենդանաբանական այգու գլխավոր բժիշկը հերքեց լեյկոզի ախտորոշումը։ Այդտեղից կարելի է հետևություն անել, որ Ամստերդամի, Եվրոպայի կենդանաբանական այգիների հետ համագործակցության հետևանքով սխալ անալիզներ են եղել»,–ասաց բողոքի ակցիայի մասնակիցներից մեկը:
Հարցին, թե լեյկոզը արյան քաղցկեղը չի՞, ակցիայի մասնակիցն ասաց, որ կենդանիների մոտ դա վիրուսային բնույթ ունեցող հիվանդություն է:
Այգու նախկին աշխատակիցներից մեկի խոսքով՝ Ամստերդամի բժիշկների կողմից վագրի մոտ լեյկոզ է ախտորոշվել, մինչդեռ Մոսկվայրի կենդանաբանական այգու գլխավոր բժիշկը ստուգելով կենդանուն՝ նրա մոտ բերանի խոռոչի քաղցկեղ է ախտորոշել։
Նախկին աշխատակիցները պահանջում են աշխատանքից ազատել ոչ միայն այգու տնօրենին, այլև գլխավոր անասնաբույժին, անասնաբույծին և այգու համակարգողին։
«Տնօրենը ու իր մանկլավիկները այգին տանում են դեպի կործանման»,-ասաց այգու նախկին աշխատակիցներից մեկը:
Աշխատակիցները նշեցին, որ գնալու են ԱԺ և իրենց բողոքը գրավոր ներկայացնելու են կուսակցություններին:
