Ամեն տարի դեկտեմբերին ամերիկյան Microsoft ընկերության հիմնադիր Բիլ Գեյթսն ամփոփում է ընթացիկ տարվա ձեռքբերումները' ներառյալ ընթերցված գրքերը: Այս տոնական ավանդույթի համաձայն՝ աշխարհի երկրորդ ամենահարուստ մարդն իր անձնական GatesNotes բլոգում հրապարակել է մի տեսանյութ, որտեղ պատմում է 2019 թվականի հինգ լավագույն գրքերի մասին։

«Այս տարի ես ավելի շատ գեղարվեստական գրքեր կարդացի, քան սովորաբար։ Սա գիտակցված որոշում չէր, բայց ինձ թվում է, որ ինձ սկսել են գրավել պատմություններ, որոնք թույլ են տալիս ուսումնասիրել մեկ այլ աշխարհ»:
Խոսելով իր կարդացած գրքերի մասին՝ նա առաջին հորիզոնականում նշել է «Ամերիկյան ամուսնություն» վեպը: Վեպի հեղինակ Թայարի Ջոնսն է, այն պատմում է սևամորթ զույգի մասին:
Երկրորդ տեղում Ջիլ Լեպորի «Այս ճշմարտությունները» գիրքը՝ ԱՄՆ պատմության մասին, երրորդ տեղում Վացլավ Սմիլի «Աճ» գիրքն, որը մոլորակի ապագայի մասին է։ Չորրորդ տեղում է Դիանա Տավենների «Պատրաստվածները» գիրքը:

Գործարարն առանձին ընդգծել է նաև Մեթյու Ուոլքերի «Ինչու ենք մենք քնում» գիրքը՝ նշելով, որ նախկինում նա անտեսում էր քունը՝ այն համարելով ծուլության նշան, բայց գիրքը ստիպել է նրան վերանայել իր հայացքները: