2012 թ Հայաստանում մարդու իրավունքների ոլորտում ամենանշանակալի խնդիրները սեփական կառավարությունը փոխելու քաղաքացիների իրավունքի սահմանափակումն է, կոռուպցիան ու կառավարությունում թափանցիկության բացակայությունը, ինչպես նաեւ դատական իշխանության անկախության սահամանափակումը: Այս մասին նշված է ԱՄՆ Պետդեպի հրապարակած Հայաստանում մարդու իրավունքների վերաբերյալ զեկույցում:
Զեկույցի մի մասը նվիրված է մայիսի 6-ին կայացած խորհրդարանական ընտրություններին. «Մայիսի 6-ի խորհրդարանական ընտրությունների խախտումները ներառում են պետական ռեսուրսների ոչ ճիշտ օգտագործումն իշխող կուսակցության օգտին, ընտրողներին կաշառելու հավաստի տեղեկությունները, բողոքների ու հայտարարությունների դիտարկման գործընթացի թերությունները, ինչպես նաեւ Ընտրական օրենսգրքի առկա թերությունները՝ չնայած որոշ բարելավումներին»:
Իշխանության բոլոր մակարդակներում կոռուպցիայի ամրապնդումը կոտրել է օրենքի գերակայությունը, չնայած իշխանությունները սահմանափակ քայլեր են ձեռնարկել, որպեսզի պատժեն ցածր ու միջին մակարդակի կոռուպցիոներներին: Դատարանները նախկինի պես քաղաքական ճնշման են ենթարկվել գործադիր իշխանության կողմից, ինչը հանգեցրել է քաղաքական հետապնդումների ու վճիռների:
«Անցյալ տարի արձանագրված խախտումներից են նաեւ բանակում ոչ մարտական պայմաններում կասկածելի մահերը, շարունակվող դեդովշինան ու սպաների ու ծառայակիցների կողմից նորակոչիկների նկատմամբ դաժան վերաբերմունքի այլ տեսակները: Ոստիկանությունն իբր թե առաջարկել է կտտանքներ կիրառել խոստովանական ցուցմունքներ ստանալու համար եւ ծեծել է քաղաքացիներին ձերբակալության ու հարցաքննության ժամանակ»,- նշված է զեկույցում:
Խնդիրների թվում նշված են նաեւ բանտերի գերհագեցածությունը, բանտարկյալների համար բժշկական ծառայությունների պակասը: Իշխանությունները շարունակել են ձերբակալել ու կալանավորել կասկածյալներին առանց հիմնավորված կասկածների:
«Նախընտրական շրջանն ընդգծվել է լրատվամիջոցների կողմից բազմակողմանկի լուսաբանմամբ, սակայն լրատվամիջոցներին նախկինի պես չի բավարարում քաղաքական կարծիքների բազմազանությունն ու քարոզչական ժամանակահատվածից դուրս օբյեկտիվ լուսաբանումը»,- կարծում են Պետդեպի փորձագետները:
Կրոնական փոքրամասնությունների անդամները տառապում են հասարակությունում խտրական վերաբերմունքից: Ընտանիքում բռնությունը շարունակում է խնդիր մնալ: Սահմանափակ կարողություններով մարդիկ խտրականություն են բախվում կյանքի գրեթե բոլոր ոլորտներում: ԼԳԲՏ ներկայացուցիչների նույնպես խտրականության են ենթարկվում, այդ թվում բանակային ու բանտային իշխանությունների կողմից: Աշխատողների իրավունքները սահմանփակ են, իսկ աշխատանքային օրենսդրությունը թույլ է վերահսկվում:
«2011 թվականի դեկտեմբերին կառավարությունը զեկույց է հրապարակել 2008թ հետընտրական իրադարձությունների ընթացքում 8 քաղաքացիական անձանց ու ոստիկանության 2 աշխատակիցների մահվան հետաքննության գործով, սակայն տարեվերջի դրությամբ ոչ ոք պատասխանատվության չի կանչվել»,- նշված է զեկույցում:
