Henaran.am «Հայաստանի անդամությունը Մաքսային միությանը կորցրած հնարավորություն է, հիմա բոլորի համար պարզ է, որ մտնելով Մաքսյաին միության շարքերը կոցնում ենք Խորը և համապարփակ ազատ առևտրի գոտու շանսերը: Անսպառ են այն հնարավորությունները, որ կունենար Հայաստանը ԵՄ-ի հետ»,-այսօր լրագրողների հետ հանդիպմանն ասաց ԱԺ արտաքին հարաբերությունների հանձնաժողովի նախկին նախագահ, միջազգային փորձագետ Հովհաննես Իգիթյանը:
Նա նշեց, որ Մաքսային միությունը մի գոտի է, որտեղ մաքսային խոչընդոտներ չկան և գոյություն ունի մաքսային ընդհանուր սահման: «Հիշեք՝ Մաքսային միության այդ Եվրասիական տնտեսական հանձնաժողովը, այդ մարմինը դառնալու է Հայաստանի հանրապետության տնտեսական բյուրոն, իսկ Վիկտոր Խրեստենկոն դառնալու է ՀՀ-ի տնտեսական Աստված, ինքը պետք է որոշի՝ որ ապրանքն ինչ մաքսային տուրք է ունենալու, ու այստեղից է հաշվելու սրա օգուտը»,-նկատեց Իգիթյանը: Նա հայտնեց, որ հայտնի տնտեսագետ Աշոտ Թավազյանը ներկայացրել է լուրջ թվեր, որ Մաքսային միությանը միանալու դեպքում 0.2-0.3 % տնտեսական զարգացում կարող է լինել: Իսկ ԵՄ-ի հետ ասոցացման համաձայնագիրն, ըստ նրա, տնտեսական մեծ հաջողությունների կբերեր: «Խոսքը մեր ապրանքը Եվրոպայում վաճառելու մասին չէ, այլ կկարողանայինք Հայաստանում արտադրել ցանկացած ապրանք, որ արտադրվում է Եվրոպայում»,-շեշտեց նա:
Բանախոսի համար անհասականալի է, թե ինչ եղավ, ինչու նախագահ Սերժ Սարգսյանը որոշեց, որ Հայաստանն անդամակցելու է Մաքսային միությանը:
«Այս հարցի պատասխանը կարող է տալ միայն Սերժ Սարգսյանը, ի՞նչ ճնշում գործադրվեց Հայաստանի վրա, տնտեսական ճնշում չէր կարող, ի՞նչ եղավ, քաղաքական սպառնալիք չեմ տեսնում:
Ռազմական առումով միակ երկիրն ենք, որ ունենք կանոնակարգված ռուսական բազայի ներկայություն: ՀԱՊԿ-ի անդամ ենք ու այն, ինչ Ռուսաստանն ասում է, անում ենք. զենք է մատակարարում Ադրբեջանին ու այդ մասին Հայաստանի իշխանությունը լռում է»,-եզրափակեց Հովհաննես Իգիթյանը:
