Աշխարհում տեղի ունեցող տարբեր փոփոխություններն ու իրադարձություններն իրենց ազդեցությունն են ունենում նաև Հայաստանում: Փոփոխվող աշխարհի մարտահրավերներն իրենց հետքն են թողնում հասարակության հոգեբանության վրա: Այս մասին լրագրողների հետ զրույցում նշեց Խ.Աբովյանի անվան հայկական պետական մանկավարժական համալսարանի զարգացման և կիրառական հոգեբանության ամբիոնի վարիչ Սամվել Խուդոյանը:
«Օրինակ, Ուկրաինայի ճգնաժամը կարևոր է նաև Հայաստանի համար` ԱՄՆ-Ռուսաստան բախման տեսանկյունից: Ռուսաստանն այսօր ցանկանում է վերականգնել իր երբեմնի դիրքը, ազդեցությունը, ինչպես ԽՍՀՄ ժամանակներում: Մյուս կողմից` Արևմուտքը ճնշում է գործադրում, մենք էլ այսօր վտանգավոր տարածաշրջանում ենք ապրում: Ռուսաստանի կոտրվելու դեպքում մեր կյանքում էլ շատ բաներ կարող են փոխվել: Հասարակությունն էլ իր հերթին երկու դիրքորոշում ունի` եվրոպամետ կամ էլ ռուսամետ, և յուրաքանչյուրն իր հիմնավորումներն ունի հարցի վերաբերյալ»,-նշեց Սամվել Խուդոյանը:
Ամբիոնի վարիչը համոզված է, որ նմանատիպ փոփոխությունները նաև բարձրացնում են հասարակության տագնապի աստիճանը, սակայն այն չի գիտակցվում, և սկսվում են դրսևորվել հոգեբանական երևույթներ:
«Օրինակ, Էրդողանի հայտարարությունը Ցեղասպանության վերաբերյալ քայլ էր, բայց այն այնպիսի բացասական ալիքի հանդիպեց, որ դիվանագիտորեն այդքան էլ ճիշտ չէր: Մարդիկ գերզգույշ են դարձել: Իհարկե, համոզված եմ, որ եթե հարմար հնարավորություն լինի, թուրքերը նույնը կանեն»,-նշեց Սամվել Խուդոյանը:
Խուդոյանը խորհուրդ տվեց հասարակությանը բարձրաձայն չհնչեցնել սեփական թշնամական մտքերը: «Պետք է որպես օրինակ վերցնենք այն մարտավարությունը, որ ունի մեր թշնամին»,-հավելեց Խուդոյանը:
Հոգեբանության ամբիոնի վարիչի համոզմամբ` այսօր մարդկանց շրջանում աճել է եսակենտրոնությունը, ալտրուիզմը պակասել, նյութապաշտությունը և հոռետեսությունը' բազմապատկվել, իսկ հայրենասիրությունը փոքր-ինչ ցածր կարելի է համարել:
