Ուկրաինայի նախագահ Պյոտր Պորոշենկոն հեռախոսազրույց է անցկացրել ԱՄՆ-ի փոխնախագահ Ջոզեֆ Բայդենի հետ: Այդ մասին, ինչպես տեղեկացնում է «Արմենպրես»-ը, ապրիլի 21-ին հաղորդել է ուկրաինական պետության ղեկավարի մամուլի ծառայությունը:
«Զրուցակիցները համաձայնեցրել են հետագա գործողությունները պաշտպանության ոլորտում, մասնավորապես, Ուկրաինային հավելյալ օգնություն տրամադրելը»,- ասված է մամուլի ծառայության հաղորդագրության մեջ:
Պորոշենկոն նաեւ Բայդենին շնորհակալություն է հայտնել Ուկրաինա ամերիկացի զինվորականներ ուղարկելու եւ «Ֆիառլես Գարդիան-2015» համատեղ վարժանքներ անցկացնելու համար: «Դա նոր եւ կարեւոր էջ է, որն ապացուցեց Ուկրաինայի եւ ԱՄՆ-ի միջեւ գործընկերության ռազմավարական մակարդակը»,- նշել է նա:
Իր հերթին Բայդենը տեղեկացրել է 2015 թվականին ֆինանսական աջակցման շրջանակներում Ուկրաինային 1 մլրդ դոլարի չափով վարկային երաշխիքներ տրամադրելու ԱՄՆ-ի պատրաստակամության մասին: Մամուլի ծառայության տվյալներով՝ փոխնախագահը նաեւ հայտնել է Դոնբասում ռազմական գործողությունների հետեւանքով հարկադիր վերաբնակներին եւ տուժածներին հումանիտար օգնություն տրամադրելու նախագծերի ֆինանսավորման մասին:
Բացի այդ, Բայդենի խոսքով, ԱՄՆ-ը մտադիր է Ուկրաինային հումանիտար օգնություն հատկացնել 17,7 մլն դոլար ընդհանուր գումարով:
Ինչպես նշում Է ՏԱՍՍ-ը, երկու քաղաքական գործիչները ողջունել են «առանձին շրջաններում, որտեղ մինչ այժմ շարունակվում են մարտերը», հրադադարի ռեժիմի ապահովմանն ուղղված ԵԱՀԿ-ի ջանքերը:
Զրուցակիները քննարկել են նաեւ Ուկրաինայի իշխանությունների կողմից իրականացվող բարեփոխումները:
