![](http://mediamall.am/timthumb.php?src=upload/71384.png&w=300&h=200&mt=1505529108)
Նյու Յորքում կենցաղային գազի պայթյունի հետևանքով, որը հանգեցրել է երկու հինգհարկանի տների փլուզման, զոհվածների թիվը հասել է չորսի, հաղորդում են տեղական զանգվածային լրատվամիջոցները:
Ավելի վաղ հաղորդվել էր երեք զոհվածների և 64 վիրավորների մասին: Մարտի 12-ի առավոտյան Մանհեթենի հյուսիսում Հառլեմի շրջանի բնակելի տներից մեկում տեղի է ունեցել գազի արտահոս: Դրան հաջորդած պայթյունը գործնականում ամբողջովին քանդել է ինչպես բուն շենքը, այնպես էլ դրան հարող մյուս բնակելի կառույցը: Ողբերգությունից 15 րոպե առաջ Con Edison ընկերությունում, որը Նյու Յորքում պատասխանատու է գազամատակարարման համար, մի քանի զանգեր են ստացվել տեղի բնակիչներից, որոնք հաղորդել են գազի ուժեղ հոտի մասին:
Ըստ վերջին տվյալների՝ անհայտ է մնում տասը մարդու ճակատագիրը: Որոնողական-փրկարարական գործողությունը շարունակվում է, հաղորդել է ԻՏԱՌ-ՏԱՍՍ-ը: