Հալեպում հունիսի 23-ին հայ է վիրավորվել: Ռամուսիե թաղամասում դիպուկահարի գնդակից վիրավորվածը Հակոբ Փայասյանն է: Նա արդեն տեղափոխվել է «Ռազի» հիվանդանոց, որտեղ կատարվել է վիրահատական միջամտություն:
Ավելի վաղ՝ հունիսի 17-ին, հրասանդի ընկնելու հետևանքով զոհվել էր «Գանձասար» շաբաթաթերթի աշխատակից Վրեժ Սապաղջուրյանը:
Վերջին երկու ամիսների ընթացքում Հալեպում տասնյակից ավելի հայեր են զոհվել և վիրավորվել: Սիրիական հակամարտության 3-ից ավելի տարիների ընթացքում զոհված հայերի թիվը գերազանցել է 100-ը: Մասնավորապես, հունիսի առաջին օրերից սկսած՝ Հալեպում և հատկապես հայկական Նոր Գյուղ թաղամասում իրավիճակը կտրուկ վատացել է: Ահաբեկիչ խմբավորումների հարձակումների հետևանքով Նոր Գյուղում մեծաթիվ բնակարաններ բոլորովին անբնակելի են դարձել, իսկ հարյուրավոր բնակարաններ նորոգելու կարիք ունեն: Երբեմնի հայաշատ Նոր Գյուղ թաղամասն այսօր աղետի շրջան է, ամայացած ու ավերակ: Նոր Գյուղը և հալեպահայությունը կործանման վտանգի առջև են կանգնել:
Կոչ է ուղղվել համայն հայությանը՝ բոլոր միջոցներով սատար կանգնել ի նպաստ անմարդկային հրթիռաձգության կասեցման՝ հանուն աղետահար ժողովրդի ֆիզիկական անվտանգության ապահովման:
