Էներգետիկայի և բնական պաշարների նախարար Արմեն Մովսիսյանը տևական ժամանակ է՝ խուսափում է լրատվամիջոցների հետ հանդիպումից: Նախարարն անգամ նախորդ տարեվերջին ասուլիս չհրավիրեց՝ պատասխանելու լրագրողներին հուզող հարցերին, իսկ կառավարության նիստի օրերին շենքի հետնամուտքից է դուրս գալիս:
Տարվա ընթացքում կառավարությունում լրագրողների ուղղած հարցերին նախարարն այդպես էլ պատասխան չէր տալիս՝ խոստանալով, որ տարեվերջյան ասուլիսին կպատասխանի, սակայն խոստացված ասուլիսն ուշանում է:
Վերջերս նա ակնարկել էր, որ ռուսական կողմը մտադիր է բարձրացնել Հայաստանին մատակարարվող գազի գինը: Մովսիսյանը խոստացել էր մանրամանսերն ավելի ուշ հայտնել: Սակայն ինչպես կառավարության նիստի մյուս օրերին, այսօր ևս կառավարության միջանցքում Արմեն Մովսիսյանին սպասող լրագրողները բախտ չունեցան տեսնելու և հարցեր ուղղելու նրան:
